Shillong, Sep 12: Meghalaya a•dokni deficit skulrangko jako ra•na ba ia skulrangna tangka paisani gita on•enggipa dakchakanirangko dontongnaba sorkario miksonganirang dongja ine Sukrobar salo, Meghalaya a•dokni Chief Minister Conrad K Sangma talataniko on•angaha.
Chief Minister-ni parakatani gitade, sorkarini ra•gatna miksongenggipa Meghalaya Education Grant (MEG)-ni bidingo sorkari chanchikuenga aro ia scheme-ko nambatatna gita sorkari, ku•pattianirangkoba ra•na nangnikenga.
Mitam skulrangde sorkarini ning•o ong•na sikenga aro mitamrangde deficit-ni gadangon ong•na nangnikskakuenga ine janapatengon, ia pilakkon sorkari, agangrikanirangchisa ja•ku de•na nangnikenga ine Sangma aganaha.
Deficit skulrangni bidingo Nongkrem-ni VPP MLA Ardent Basaiawmoit-ni Assembly-o sing•anina Chief Minister, ia kattarangko aganaha.
Sorkarini skul aro college-rangko namdapatna gita sorkarini krenge kam ka•enggipani bidingo janapatskaengon, a•dok gimiko dam 2500-na batpilen skul nokrang namsrangjahachim indiba bang•bata skul nokrangkon sorkari taripile on•na man•aha aro ia skul nokrangko taridapna gong crore 1000-mangni gita koros ka•aha ine Chief Minister parakataha. Da•o dam 500-mangni gita skul nokrangsan matchotna nangaiaha ineba ua aganaha.
Deficit aro adhoc skulrangko man•chape sorkarini dakchake on•enggipa pilak skul nokrangkoba taridape on•na sorkari miksongenga ineba Chief Minister parakataha.
Deficit aro adhoc skulrangna on•enggipa grant-rangko bariatchina dabienggipani gimin janapatskaengon, ia grant-rangko baridapatanio gong crore 200 ba 300-mangko nangdapkugen, uni gimin sorkari name chanchichengna nangkuenga ine Sangma aganaha.
Iana skang, a•dokni Education Minister Rakkam A Sangma-ba aganchakaniko on•angengon, deficit skulrangna dormaha on•e dakchakaniko sorkari dontongjawa ine parakataha.
Mitam skul aro college-rangde jakgitele chalaina aro mitamrangde sorkari jako ra•china dabitokenga ine janapatskaengon, ia dabianirangko sorkari name niengkua ine Education Minister aganaha.
Deficit-ni gadango dam 3361 LP skulrang, dam 881 UP skulrang, dam 2363 secondary skulrang aro dam 186 HS skulrang donga ine talataniko on•angengon, ia skulrangna sorkari, dormaharangko on•e dakchakenga indiba gipin korosrangkode skul managing committee (SMC)-rang niskaenga ine Education Minister parakataha.
Songadam nokadamrango donggipa sorkari LP skulrango skigiparang chu•ongjaengani a•sel name dakna man•jaengani gimin iandakgipa skulrangona SSA skigiparangko apjitatskana sorkari miksongenga ineba Sangma aganaha.
Na·simang iakoba nina man·gen:
Na·simang iakoba poraina man·gen: India a•songni gital Vice Prez ku•mikcheta
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
