Shillong, Jymmang 03 : Ki kam ban khangdam bad ka jingkam biang ia ki par dewiong bala iehshrah ha Meghalaya kala jam shakhmat bad lah pyndep ruh ban pynkhreh ia ki detailed project report (DPR) jong ki artylli ki pilot project, hynrei ka jingtyrwa na ki bor District ka dang sahteng, ong ka Justice BP Katakey Committee ha ka 37th interim report bala aiti sha ka Iingkashari High Court.

Ka kaiphod ka batai bniah ia ka jingiaid ki kam (status) ba iadei badka jingkhang dam ia ki par dewiong bad ka jingynbha bha ia ki jaka ba shah ktah na ka tih par, haba pynpaw ba watla ki jingpynkhreh ia ki kot ki sla halor kine ki pilot project ki dang sdang, ka jingbuddien na ki bor District ka iaid suki bha.

Kat kum ka kaiphod, ka Central Mine Planning & Design Institute Limited (CMPDIL), ka shnat treikam ka Coal India Limited, kala aiti ia ki DPR ba khatduh jong ki artylli ki pilot project ha ka 5 tarik Lber, 2026.

Ki artylli ki jaka kiba la dep ithuh ki dei “kawei ka thup jong ki par dewiong bala iehshrah ha shnong Sutnga, East Jaintia Hills kaba don ia ka jingeh ka jaka haduh 10 hectare” bad “kawei pat ka dew ki par dewiong ha ki par ka Arenggitim Hills ha South Garo Hills….kaba ka jingheh ka jaka ka long 40 hectare”.

Ki project ki kynthup ia ka jingkhang dam ia ki par, pynbud da ka jingpynbha bad ban thung ia ki dieng ki siej.

Ka CMPDIL kala shah thung kum ka Project Management Consultant ha ka 6 tarik Jylliew 2024, katba ka Meghalaya Industries Development Corporation (MIDC) kum ka Project Implementation Unit.

“Ia ki DPR ba khatduh lah dep ban phah sha u Member Secretary, ka Techninal Committee ka MEPRF, uba la ai pat ka jingbatai ia baroh artylli ki project” ong ka kaiphod.

Ka Technical Committee, ha ka jingialang ba long ha ka 27 tarik Lber, 2026, “kala rai ban phah ia baroh artylli ki jingtyrwa sha ka Oversight Committee ka MEPRF ban ai jingmynjur, ka ban pynbud pat da ka jingkhot tender bad kiwei kiwei, da ka PIU jong ka project, ka MIDC”.

Ka Committee kala pynpaw ba ka Tnad Mining & Geology kala “thoh sha baroh ki Deputy Commissioner ba dei khmih lyngba ka shithi No. MG.57/2021/335, ba 12.02.2026, ba kin phah ia ki jingtyrwa ban khangdam ia ki par.

“Hynrei, ym pat shym la ioh satia ia kino kino ki jingtyrwa kat haduh kine ki sngi” ong ka kaiphod.

Ka jubab na ki District ka iapher kawei na kawei pat. U Deputy Commissioner ka East Jaintia Hills, u pyntip ba ki jingtyrwa ban ithuh ia ki par “lah dep ban phah sha ka Office jong u Executive Engineer ka PWD (Building), Jowai ba kin khmih bniah ia ka” hynrei “haduh mynta ym pat shym la phah pat ia ka jubab sha ka Ophis”.

U Deputy Commissioner ka South Garo Hills, ula pynpaw “ia ka jingthut ka shongsuk shongsain ha ri-lum Garo” kum ka daw ka jingeh ban leit leh ia ki sorjamin ban lah tyrwa ia ka jingkhang dam ia ki par hapoh ka por bala buh.

Ha South West Khasi Hills, 83 tylli ki par lah dep ban ithuh bad dep phah sha ka Directorate of Mineral Resources “ryngkat bad ki dur bad ki GPS coordinate, khlem da ioh ia ka jingbit bad jingpdiang jong ki trai par”. La bthah mynta ia ki Ophisar “ba kin pynioh ia ka jingbit bad jingpdiang na ki trai par ban khangdam noh ia ki par jong ki, kiba la iehshrah bad ban pynbha pat ia ka mariang kaba la shah pynjulor”.

Ka kaiphod ka bynta ba “ym pat ioh pdiang satia ia kano kano ka kaiphod na ka Deputy Commissioner ka West Khasi Hills District”.

Ka jingai khubor ba khatduh jong ka Directorate of Mineral Resources lah phah sha u Project Coordination for Mining Area Reclamation, kaba la phah ruh sha ka CMPDIL, ha ka 9 tarik Rymphang 2026.

Pule ruh : Kynnoh trei torti ka Company ia ki muri ha surok Maweit-Kulang Nongjri

Peit ruh :

Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.

Bud ruh ia ki ha ka

Twitter – twitter.com/nemediahub

Youtube channel – www.youtube.com/@NortheastMediaHub2020

Instagram – www.instagram.com/ne_media_hub

Download ia ka app jong ngi na playstore – Northeast Media Hub