Williamnagar, Feb 23: East Garo Hills a·jani dingtang dingtang dolrangni nangrimgimin NGO-rang, jekai GSU, FKJGP, AAYF, AYC, FAF, AIGU, ASWA, Mothers Union, Mothers Federation, College Students Union, Auto-taxi, Sumo Pickup Association-rang, Club-rang, songni-nokni dilgiparang aro a·gipi songdongkamgiparang baksa Sombar salo Williamnagar GSU Office-o tom·aniko ong·ate East Garo Hills Joint Action Committee (EGHJAC) ine bimingko done gital dolko songangaha.
Iako songanio miksonganiara, Garo Hills Autonomous Distrct Council (GHADC)ni eleksin ong·nasigipao susachina gita dingtang-dingtang political dolrangni gipin jatrangna tikit chamaniko jegalangna aro uni kosako warachakangna miksonganio songaha ine EGHJAC-ni padot Saljrang Tengrik R. Marak koborna parakataha.
GHADC eleksino susana gita gipin jatrangna tikit chamaniko jegalsona Mongolbar salo poster campaign-ko a·bachengataha, indake re·baenggipa February 26 tarik chong·motan, Sukrobar salo Rongrenggre kal·chakram biapo tom·bimonganiko ong·ate jinma re·jomaniko ong·atanggen, uni ja·mano songantiona re·roroenba u·igijagiparangko mikgaoatna jegale segipa lekka pal·takrangkoba sualanggen ine EGHJAC-ni padot seachi janapataha.
GHADC-de A·chikrangni niam-retirang aro dakbewal-rikbewalrangko ripinge dongipa Niam Sunduk-sa ong·a, uni gimin gipin jatrang iano kam ka·na aro sixth schedule-o nappabroke eleksino susana bil dongja aro GHADC-o susae a·bri jatni manderangko sason ka·na man·ja ine janapatan baksa, jatna kam ka·anirango pilakkon ku·cholsan ong·e bakko ra·china aro bakrimchinaba sakantikon EGHJAC, mol·molataha.
Unomiting, ong·nasienggipa GHADC-na pu·onatanio gipin jatrangna tikit chamaniko jegale segipa memorandum-koba Mongolbar salo a·dokni skotong minister Pa Conrad Sangma-ni jako, uni East Garo Hills a·jaona wenangani somoio EGHJAC-ni dilgiparang on·angjolaha.
