Williamnagar, Aug 15: India a·songni gipin biaprango gitan East Garo Hills a·jaoba India a·songni chang 79-gipa jakgitelani salko Williamnagar-ni Rongrenggre Government Higher Secondary School kal·chakramo maniangaha aro ia salko manianio, a·dokni Cabinet Minister aro Williamnagar-ni MLA Marcuise N Marak, mongsonggipa sokgipa ong·e, a·songni nisanko badalate on·angaha.
Ia salko manianio, East Garo Hills a·jani Deputy Commissioner RP Marak, Superintendent of Police Stephen R Rynjah, dingtang dingtang songni Nokma-Sanerang, official-rang, chatro chatrirang, skigiparang aro jolo songdongenggipa manderangba bak ra·angtokaha.
Ia manianio Police, NCC, Bharat Scouts & Guides aro gipin dolrangko man·chape gimik dol 31, march past ka·anio bak ra·angaha aro march past-ko East Garo Hills DEF-ni parade commander, AB SI Richmond Bakan R Marak baksana second-in-command AB SI Chintu K Marak dilangaha.
March past matchotani ja·man, cultural program, bi·sarangna kal·susaani, gittimrangni budu salgrikani aro DC XI baksana Medical XI-ni gisepo exhibition football match-koba ong·atangaha.
East Garo Hills a·jani Rongjeng Civil Sub-Division-oba a·songni chang 79-gipa jakgitelani salko maniangaha aro ia manianio, Rongjeng-ni MLA Jim M Sangma, a·songni nisanko badalate on·angskaaha.
Apsan daken, Songsak aro Samanda C&RD Block-rangoba, manderang a·songni jakgitelani salko kusi ong·bee maniangtokaha.
