Shillong, Aug 15: India a·songni jakgitelani salko Meghalaya a·dokni skotong Shillong songjinmao manianio a·dokni Chief Minister Conrad K Sangma, jinmana aganprakengon, Khasi, Jaintia aro Garo jatgittamni ‘Agan-me·apa’-ko ra·dime aganangenba, chakchikrakani, ku·mong nangrimani aro ka·dongani gunrang baksa janggi tangchina a·doko songdongenggipa manderangko didiangaha.
A·songni chang 79-gipa jakgitelani salko manianio, a·dokni manderangna agan-ku·pattianirangko on·angengon, ia jatgittamni agan-me·aparangko ra·dimenba, mangrakbatgipa aro an·tangtango pangchakna man·gipa Meghalaya-ko ong·atchina Sangma didiangaha.
Khasi-rangni agan-me·apa ‘Ka Bhalang Ka Imlang’ ba ‘Na·a jeko daka uan gimikni namgnina ong·china’ ingipa kattani gimin janapangengon, a·doko songdongenggipa mande sakantikon, songsalni namgnina dangdikgiparang ong·china Chief Minister didiangaha.
Jaintia ba Pnar-rangni agan-me·apa ‘Tip Bru Tip Blai’ ba ‘Isolko ma·sina gitade mandeko ma·sichengna nanggen’ ingipa kattani bidingo janapangskaengon, mandeskako mande ra·grikanichi Isolko mande ra·china Chief Minister ku·pattiangaha.
A·chikrangni agan-me·apa ‘Bija gita ma·dime, na·tik gita sikkonge’ ingipa kattani gimin talataniko on·angskaengon, songsalo, a·doko aro a·songo ku·mong nangrimani dongna nanga ine Chief Minister aganaha.
Ia jatgittamni agan-me·aparangara, ramram kattarangsan ong·ja indiba a·doko songdongenggipa jatrangni seng·ani aro bilakaniko mesokanisa ong·a ineba Sangma aganaha.
A·doko lekka pora, an·seng baljokani, songadam nokadamrango namroro silroroani aro dingtang dingtang kamrangko nambatatna gita sorkari rakbee kamko ka·enga ine janapatskaengon, iandakgipa jatni gamchatgipa bewalrangan namroro silroroani ja·pang ong·china ine Chief Minister aganaha.
A·doko namroro silroroanirang nokdang ge·antionan sokchina gita samtangtango ong·telaigiparangko simsak nirokchina aro songsalo ku·mong nangrimaniko bilakbatatenba krimkro kamko ka·china Sangma didiangaha.
Jakgitelanide bilsi 79-na skang a·songni man·gipa jakgitelani ong·ja indiba mikkangchi an·chingni dedrangna an·ching maiko dakna miksongenga uasa ong·enga ineba Chief Minister aganaha.
Mikkangchi nambatsranggipa Meghalaya-ko ong·atangkuna gita apsan miksongani aro on·kangani baksa a·doko songdongenggipa mande sakantikon ku·cholsan ong·e re·mikkangangkuchina gitaba Chief Minister ku·monganiko on·angaha.
Na·simang iakoba nina man·gen:
Na·simang iakoba poraina man·gen: EGH-oba a·songni chang 79-gipa jakgitelani salko manianga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
