Shillong, Feb 21: Assembly election-na mikkang-mikkang da·ororo a·dokni dingtang dingtang biaprango eleksinna ding·chaosoenggipa aro doltangtangna chakgipa manderang adita kajia-golmal aro so·so-jengjengko ong·atenganiko Meghalaya-ni Chief Electoral officer, F. R Kharkongor, u·iatangaha.
Phulbari jolo changgni dake obostarang ong·aha, skanggipao sak 124 manderangni kosako niamo pangchake ja·kuko de·ataha aro CrPc-ni section 107-ko ra·gatatani ja·man sak 25 manderangko rim·aha ine Kharkongor, Mongolbar salo u·iatan baksa, gnigipa mamlaoba ge·gni FIR-rangko segataha ineba u·iatjolaha.
Apsandake, West Shillong constituency-o saksa candidate-ni noko National People’s Party (NPP) aro Trinamool Congress (TMC) dolna chakgiparangni gisepo kajia ong·e adita nanggrikanggipani bidingo sing·skaon, ia mamlako sandirokengmiting, indiba skanggipao ong·gipa obostao sak 50 manderangko rim·aha jeoni sak 15-de NPP doloni aro sak 16-ara TMC-oni ong·a ine talatenba, gnigipa mamlako da·o sandirokatengani gimin sawarangni jak donga uko aganna gita man·kujawa, iako matchote sandiatani ja·manosa chu·gimikkode talgen ine Chief Electoral Officer aganchakangaha.
Indake ong·engon, pilak obostarangko da·o sasonona ra·bana gita man·enga aro a·dok gimikchin nanga gita simsak-nirokataniangkoba dakenga ine Chief Electoral Officer u·iatjolaha.
