Shillong, Feb 21: Mawpdang-oniko a•a breanio gong kror 140-na baten tangkarangko NPP-chi dilgipa MDA sorkari jakkalsretaha ine Mongolbar salo, Meghalaya Trinamool Congress (TMC) matnangataha.
Iani bidingo TMC-ni office-o kobor ra•timgiparangna talate on•angengon, a•dokni tangka paisarangko jakkalsretani gimin MDA sorkari, manderangna aganchakaniko on•na nanga ine TMC-ni dilgipa Dr Mukul Sangma dabiangaha.
Sangma-ni parakatani gitade, Mawpdang jolo donggipa Mawkhanu songni acre 807 ong•gipa a•ako breanio a•dok sorkari, songni manderangnade square feet-prako gong 45 ka•e on•enba, manderangoniko breskagipa dolnade square feet-prako gong 85 ka•e on•skaahachim.
“Damrangko 2021 bilsini October 4 tariko cabinet tik ka•aha aro ia proposal-ko urban affairs minister dakdilenba ia proposal-ko revenue department ra•chakaha. Cabinet-ni pilak kamrangkon chief minister-sa ra•chakengani gimin lekkao mesokani gitade, CM, Revenue Minister aro Urban Affairs Minister sakgittaman, a•a nokgiparangna on•skana man•gipa gong kror 140 tangkarangko jakkalsretaha,” ine Mukul Sangma parakatenba, ia tangkarangko jakkalsretani bidingo sandirokaniko dakchina dabiangaha.
