Shillong, Feb 21: Meghalaya a•doko Inner Line Permit (ILP)-ko ra•gatchina dabianiko chu•sokate on•ningjaengani gimin Mongolbar salo, a•dokni Deputy Chief Minister Prestone Tynsong, BJP-ko matnangatenba, ian ma•mongo aro a•dokoba BJP-ni ‘politics kal•anisa’ ong•enga ine parakataha.
ILP-na dabianiko chu•sokate on•na gita BJP-ni election manifesto-o ku•rachakgipani gimin janapatengon, 2019 bilsion NPP-chi dilgipa MDA sorkari, ILP-na resolution ra•e ma•mong sorkariona ra•angahachim indiba BJP sorkari, ILP-na dabianikosan ong•aigija Khasi aro Garo ku•sikrangko Eighth Schedule-o napatchina dabianikoba chu•sokatna gisik nangchipjaenga ine Tynsong parakataha.
ILP aro Eighth Schedule-ni bidingo a•dokni manderang ru•uta bilsirangonin dabiengachim indiba da•o election ong•na skangsa BJP, ia kamrangna gisik nange mesokbaenga ineba Tynsong matnangataha.
Deputy CM aro NPP-ni national vice president Prestone Tynsong-ni parakatani gitade, a•doko songdongenggipa manderangni namgnina NPP-chi dilgipa MDA sorkari, Meghalaya Residents Safety & Security Act (MRSSA)-koba taridape ma•mong sorkariona watatahachim indiba da•onan ia Home Affairs Ministry-ni ning•on ong•kuengachim.
A•doko songdongenggipa manderangni nangnikanirangko chu•sokate on•chipjaengania a•doko songdongenggipa manderangna BJP-ni simsakgijaniko aro gisik nanggijaniko mesokanisa ong•a ineba ua aganaha.
NPP-o ka•dongchina gita a•dokni manderangko didiatengon, MDA sorkarina skang darang dolrangni jako ra•na ka•donggijagipa pilak kamrangkon NPP-sa jako ra•e ka•dilchenggipa ong•aha ine NPP-ni national vice president parakataha.
