Shillong, Jan 11: Ganol Hydro Power Project-ko matchotgijan a•bachengate on•aha ine dingtang dingtang dolrang matnangtokahani gimin Meghalaya a•dokni Chief Minister Conrad K Sangma jegalatenba, iani bidingo matnangenggiparangna talataniko on•angaha.
Chief Minister-ni talate on•angani gitade, ia power project-ni skanggipa unit-kosa a•bachengate on•enga ine ia unit-ko a•bachengate on•ani salon ua jinmana u•iatahachim.
“Ia project-ni bangki damgni unit-rangkoba a•bachengatna nangkuenga ine a•bachengon chinga aganmanahani gimin ia power project-ni gipin damgni unit-rangde kam ka•kujaenga ine agananiara namen gualani ong•enga,” ine Sangma parakataha.
Ia project-ni kamrangko da•o ka•engkua aro unit damsakode a•bachengatmanaha ine janapatengon, bangki damgni unit-rangkoba da•o sal 15 ba sal 30-mangni gisepon a•bachengatna man•gnok ine Chief Minister parakataha.
22.5 Mega Watt (MW) Ganol Hydro Power Project-ni 7.5 MW ong•gipa Unit damsako re•anggipa January 4 tariko, Meghalaya a•dokni Chief Minister Conrad K Sangma, oprake on•angahachim ine nikna man•a.
Ia Ganol Hydro Electric Project-na 7.5 MW ong•gipa damgittam Turbine-Generator unit-rangko chate, Tura jillani samba jolo donggipa Ganol chiringko jakkalengachim aro ia damgittam Turbine – Generator unit-rangoni damsako re•anggipa antini Budbar salo a•bachengate, bangki damgni unit-rangkoba da•o re•baenggipa jarango a•bachengatskana manchiengachim.
