Shillong, Jan 11: Mawbah-o nok wa•al kamanichi Mongolbar sal dipet gimaenggipa bi•sa sakgnian siangaha ine Budbar salo Meghalaya a•dokni Chief Minister Conrad K Sangma u•iatenba, ia a•sel ong•anina an•tangni suk ong•gijaniko parakataha.
Ia a•selni bidingo jolni MLA, Deputy Commissioner baksa agangrikaha aro ua an•tangba dongimin niamrango pangchake nanga gita dakchakanirangko on•gen ineba Chief Minister ku•rachakaniko on•ataha.
“Ia a•sel ong•anio bi•sa sakgni siangna nangaha aro ian uamangni nokdangna namen ka•a be•ani somoi ong•enga. Ia nokdangna sorkari pilakni gita dakchakanirangko on•na jotton ka•gen,” ine Sangma aganaha.
Mongolbar attamo, Shillong songjinmani Mawbah jolo wa•al kamanichi nok te•bonga nisigalako man•ahachim aro ua somoionin nokdang ge•sani bi•sa sakgni gimaengachim ine nikna man•a.
Indake ong•engon, East Jaintia Hills a•jao niam gri koela bikotani a•sel mande sakgittam janggitangtangko gimaatna nangaha ine kobor on•gipani bidingode a•dokni Chief Minister, mamingkoba aganna gita jechakskaaha.
“Da•o dipet chinga iani bidingo maming u•iatanirangko man•soa dongkuja aro ian kakket ong•ama ong•ja, ukoba name ma•sikuja. Iani bidingo chinga mitam manderangonikosa knasona man•engkua indiba mande sakgittamni siani bidingo official-rangni name kobor on•aniko man•soa dongkuja,” ine Chief Minister parakataha.
