Tura, Aug 21: Garo Hills-ni Civil Society Organization-rangni (CSO-rang) nangrimgimin dolrang minggnini bidingo jegalanirangko dakangaha: Garo Hills Autonomous District Council-o (GHADC) tangka-paisarangna neng•nikani aro Tura Medical College and Hospital-ko (TMCH) private dolrangna pakwatna manchisoani.

Ia nangrimgimin dolrangara- Achik Youth Welfare Organization (AYWO), Federation of Khasi Jaintia and Garo People (FKJGP), Garo Students’ Union (GSU), Association for Democracy and Empowerment (ADE), aro Federation for A’chik Freedom (FAF) ong•a.

Ia CSO-rang ja 43na baten dormaharangko man•kugijani bidingo jegalanirangko dakenggipa Non-Gazetted Employees’ Association (NGEA) baksa bakrimaniko kobor ra•timgiparangna parakataha. Uamang chasongni chasongna ong•rorobaenggipa GHADC-ni Executive committeerangko name kam ka•gijanirangna, ku•mitu ra•anirangna aro tangkarangko simsakgija jakkalanirangchi GHADC-ko bilgriatanina matnangaha.

Dormaharangko man•gijani a•selo kam ka•giparang gro-jinang nangaha aro bang•a neng•nikanirangko chagronganiona sokaha aro ia obostara kosako donge kam ka•giparangni chu•sokgijanisan ong•aija indiba manderangko togianiba ong•a ine uamang matnangaha. Uandake bakrimgimin dolrang man•na nanggipa dormaharangko ta•raken sualatchina, Service and Finance Rules-ko tarichina, pilak koros ka•anjrangko digital ong•atna aro Public Accounts Committee-ko bikotna dabiangaha.

Una agreba, a•dok sorkari-ni TMCH-ko Public-Private Partnership (PPP) modelni ning•o private dolrangna pakwatna tik ka•anirangkoba CSO-rang jegalangaha. Uamangni aganani gitade, private dolrangna pakwaton sanna-banani cholrangko dakna bang•a manderangan korosrang amchakjawaha aro medical college-ni manderangna dangdike on•gniko champenggen.

Una agreba, TMCH-ni seat-rangko komibeoba 85%-ko biaptangni chatro-chatrirangna tikatna nanga, aro da•ona kingking 50% seat-rangkosan tikatkuainga, aro ian Assam a•dokni sorkari-ni medical college-rango 85% seat-rangko on•aoni namen dingtanga ine uamang janapaha. College-ni a•ako songni manderang indin on•ahani gimin, uko a•dokan chalaina nanga aro manderangni nangnikanirangko on•na nanga ine uamang aganaha.

Uandake CSO-rang NGEA-ni jegalanirango bak ra•manaha aro ia minggni dabianirangko parakatna August 21-oni 23 tarikrangona Garo Hills gimiko poster campaign-ko a•bachengataha ine u•iataha.

Iani bidingo, Sombar sal, August 25 tariko, salni 12 bajioni attamni 2 bajiona kingking dokkanrangko chipna aro pala-sim•anirangko dontongchina ge•etanirangkoba on•ataha.

“Garo Hills-ni manderang uamangni man•gnirangko rakkina chingko nichaka, aro chinga chingni ku•chakgiminoni ekjawa,” ine agane, uamangni dabianirangko chu•sokatjagenchimode, dal•bata jingjengatanirangko ong•atgen ine CSO-rang mikrakataniko on•angaha.

Na·simang iakoba nina man·gen: 

Na·simang iakoba poraina man·gen: B’desh-oni napsrukbagiparangna sima jolrango kenchakna nangani ong•enga

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub