Shillong, Feb 21: Mija Sombar attamchibara, UDP-ni candidate ong·e Sohiong constituency-o susana am·enggipa HDR Lyngdoh-ni ka·tong saeming tanggitik a·gilsakko watanganina, a·dokni dakchakgipa skotong minister Pa Prestone Tynsong, uni duk aro kalimpaaniko sianggipani nokdangna on·angaha.
Tanggitik ong·e uni a·gilsakko watanganiara namen dukni ong·chongmota, uni nokdangna angni gisik-ka·tongoni kalimpaaniko on·atenga aro apsandake, chingni NPP dolni gitaba sianggipani nokdangna aro uni constituency-ni manderangna kalimpaaniko on·atenga ine Pa Tynsong parakataha.
Joltango Maheh bimingchi okamako man·gipa HDR Lyngdoh sagiara batanggimin chango sorkariko rikanggipao bak-rengsi ong·paachim, aro bilsi-bongani ja·man ianpakni eleksino ua susataina gita taripiltaiengachim, uni a·gilsakko watanganian ua jolni manderangna dal·en gimaani gita ong·skaaha.
Pa Lyngdoh, 1988 bilsio Hill State People’s Democratic Party (HSPDP)-oni MLA-na skanggipa ong·e seokako man·chengaha aro 1998 ona kingking jolna dangdike on·angkuaha. 1998 bilsini eleksinode ua, United Democratic Party (UDP)-ni RA Lyngdoh-ni jako ama cha·skaaha. Uandaken, 1999 bilsio, Sohiong-Nongspung Constituency-o Indian National Congress (INC) doloni MDC-na seokako man·taiaha. Iani ja·manchi, 2003 bilsion ua changsatai MLA-na seokpiltaiako man·aha aro 2018 bilsiona kingkingan Sohiong seat-ko chu·gimik bilsi 15-rangna kingking ra·kame dongangani ja·man, 2018 bilsini eleksino, HSPDP-ni Samlin Malngiang baksa susagrike bang·gija vote-rangchi ama cha·taiaha.
Indake ong·engon, Pa Lyngdoh-ni tanggitik a·gilsakko watangani gimin, election commission, Sohiong constituency-o re·baenggipa 27 tariko pu·ongniko dontongatna gita tik ka·angaha.
Iandakgipa obostao, pu·onaniko dontongatchina gita RO agan-ku·pattaniko dakronga aro iakon Election Commission-ona watata ine Meghalaya-ni CEO, F Kharkongor, Mongolbar salo u·iatangenba, ia damsa constituency-o eleksinko ong·atna gita Election Commission, gital dake tarikko u·iatgen indiba bangki constituency-rangode manchigimin tarikon pu·onaigen ine ua agandapataha.
