Shillong, Jylliew 19 : U MDC ka Voice of the People Party (VPP) na Mawkyrwat Bah Pynkhrawboklin Kharjahrin, ula iehnoh kam kum u Executive Member (CEM) jong ka Executive Committee ka VPP ha Khasi Hills Autonomous District Council (KHADC).
Ka khubor iehnoh kam une u MDC kum u EM ka KHADC ka dei kaba la mih la katto katne taiew mynta bad kat kum ki khubor hamsaia la kynnoh ba kane ka jingiehnohkam ka dei namar ka jingdon ka jingiapher jingmut bad ki nongialam kane ka party.
Kaba phylla ka long bad wat hapoh ka Dorbar Lyiur ba dang iaid mynta, une u MDC u dang shong ha ka shuki EM ha ka Liang Synshar hapoh ka Iingdorbar.
Hynrei kat kum ka jingpynbna bala pynmih da u Commissioner & Secretary ka Tnad District Council Affairs (DCA) ka Jylla Bah CVD Diengdoh, ha ka sngi Thohdieng (19 tarik Jylliew), la pyntip ba u Lat ula pdiang ia ka shithi iehnohkam une u MDC kum u EM ka Council.
Kane ka dei ka sien kaba ar ba ki MDC ka VPP kila hiar shuki hi napoh ka Executive Committee (EC) tang hapoh ka shisnem saw bnai ba kane ka party kala synshar ha KHADC.
Tang hynniew bnai ba ka VPP kala shimti ia ka bor synshar ka KHADC, nyngkong eh u MDC ka Langkyrdem-Laitkroh Bah Shembor Rynjah ula hiar shuki kum u Chief Executive Member (CEM) bad mynta sa u MDC ka Mawkyrwat uba la hiar shuki na ka kam EM.
