Shillong, Sept 3: Re·anggipa August-ni 13 tarik pringwalo, Hynniewtrep National Liberation Council (HNLC) bobil dolni gitcham secretary Cheristerfield Thangkhiew-ko police-rangni so·otgalaniko jegalna gita Sukrobar salo, ‘Sur Ki Nong War Jaintia’ dolni gita jinma tom·e re·jomaniko, West Jaintia Hills a·jani Amlaren Civil Sub-Division-o ong·atangaha.
Jinma tom·e re·jomanio jolni manderang, police-rangni kamko jegale aro a·doko tom·tomaniko rakkina man·jaengani gimin sorkariko jegale chrik a·bokanirangko dakangtokaha.
Jinma tom·aniko Amlarem-ni Enowel Hall-o ong·atangaha aro ia tom·anio dingtang dingtang dilgiparang aganprakengon, police-rangni ka·saninggija dakgipa kamko jegale, so·ota man·gipa Cheristerfield Thangkhiew-na kakket bichalko dabiangtokaha.
Jinma re·jomani maming a·sel grian tom·tome matchotangaha.
