Shillong, Sep 3: Assam aro Meghalaya a·dok damgnini gisepo sima-arina kajia golmal gnanggiparangko tale ra·china gita Meghalaya sorkarini songanggipa regional committee-rang Sukrobar salo Shillong-o tom·angaha.
Tom·ao, dakchakgipa skotong minister Pa Prestone Tynsong-ni dilanichi dolgittam regional committee-rangni chairman, Cabinet Minister Pa Renikton Lyngdoh aro Snaiwbhalang Dhar baksana gipinrang jekai Ri-Bhoi, West Khasi Hills aro East Jaintia Hills-ni Deputy Commissioner-rang a·dokni skotong minister Pa Conrad K Sangma-ko cabinet kutturio grongenba uamangni tale ra·bagiminko on·angaha.
Tom·a matchotani ja·man kobor ra·timgiparangna aganganganio, ian regional committee-rang baksa skanggipa tom·ani ong·enga aro a·dok damgnini gisepo kajia golmal gnanggipa biaprangchina uamangni re·ange nibao ma·sie ra·bagiminni bidingo bang·gija talatanirangko DC-rang on·angaha ine skotong minister u·iataha.
Uni aganani gita, iani gimin taldapanirangko dakangkugen aro sima-arini mamlako namgrikaona ra·bana gita sorkari ja·kurangko de·atenga ine janapatan baksana, re·baenggipa salgni ba salgittamni ja·man committee changsatai asonge chanchirimtaigen aro jensomoio assembly tom·ani matchotahaon Assam aro Meghalaya a·dok damgnini delegation-rang, uandakgipa biaprangona re·ange apsan nieaniko dakgen ineba Pa Sangma u·iatdapaha.
Iani bidingo skanggipa report-kode Meghalaya sorkari tarimanaha aro ia golmal gnanggipa biaprango ong·enggipa da·oni obostarang aro ma·ambini sakkirango pangchake man·a kakketan sorkari ia mamlako matchotate on·na gita nienga. Namatna man·chipgijagipa ia neng·nikanirangko namgrikaona ra·bana gita mikkangchi kam ka·anio manderangni gisikni bewalrang, gamrangko jitanio administrative-ni niamrang aro tangka-paisani gita manderangni janggi tangani gadangrang gimikon ning·tue chanchijolgen ineba skotong minister agandapataha.
