Jowai, March 22: Mikbokanichi sakgipinni janggiko ra·ani mingsa obostako West Jaintia Hills a·jaoniko knasoani gita, Mynsngat songoni saksa bilsi 29 ong·gipa Pynkhreh Surong minggipako so·otanio jak donggipa sakgni manderangko a·jani police-rang Butbar salo rim·aha.
Koborko man·soani gitade, so·ota man·gipa mande re·anggipa March 10 tarikoni gimaengachim, aro uni gimaaniko nokdangni manderang mni Mongolbar salosa Nartiang police station-o FIR-ko segatangaha. Uandake, ia mamlako police-rang sandiatenba, re·anggipa chang so·ota man·gipa I Love You Talang minggipani jonggipa aro WJH-ni Murap songoni bilsi 21 ong·gipa Meban Talang-ko Lad Demthring songoniko rim·aha. Iani ja·man, sakgipin jak dongpagipa aro Mynsngat songoni bilsi 27-ong·gipa Sambun Dkhar-koba Wahiajer-oniko rim·na gita man·aha.
Rim·ako man·giparango police-ni sing·sandianiko dakaton, Pynkhreh Surong-ko so·otaniko uamang ku·rachaktokaha aro East Khasi Hills a·jani Pommura song sambao manggisiko gopgipa biapona police-rangko re·dilangaha.
Ia obostani bidingo bakdrangoni saksa Hep Surong-ni agan-talatani gitade, sianggipa Pynkhreh, Mahindra Pickup gari gitalko breaha jeni register nomborkon man·kujachim, aro uni jako lak 1 na baten tangkaba gnangchim, unasa Pynkhreh-ko so·otna nanga ga·aka aro garikoba man·pilkuja ine parakataha.
Indake ong·engon, ia obosta ong·aniko Mynsngat-ni Waheh Chnong, Pham Pakma jegalatenba, dos dakgiparangko raken sasti on·china dabiangaha.
Iakoba poraie nina man·gen: Mawhati aro Nongkrem-na gital C&RD block-rangko on·na chanchia dongkuja: Pa Mondal
