Guwahati, Feb 3: Ia chang Assam Assembly election-ko ong•atanio Assam a•dokni Health, Finance aro Education Minister aro Jalukbari constituency-ni MLA Himanta Biswa Sarma-ko Assam Jatiya Parishad (AJP)-ni candidate chegen ine da•al Budbar salo, AJP-ni president Lurin Jyoti Gogoi parakataha.
Assam a•dokni Sualkuchi-o AJP-ni election campaign-ni bak gita jinma aganprakengon, ia chang election-o Jalukbari-o dilgipa dingtang ong•gnok ine Gogoi parakataha.
“Jalukbari-ara dingtangmanchagipa constituency ong•a aro ia jolo songdongenggipa manderang, joltangna ka•sagipa ong•ani gimin ia chang election-o AJP chetelgen,” ine ua aganaha.
Indake ong•engon, Lurin-ni agangipa kattarangna aganchakaniko on•angskaengon, pilak political dolni dilgiparangan uni constituency-na re•bae BJP dolni dilenggipa sorkarini kamrangko nie ra•ena man•gen ine Himanta Biswa Sarma parakatskaaha.
“Pilakan ia constituency-ona re•bae niechina chinga nangnikenga. Ia constituency-ona re•bae niegenchimosa chinga ia constituency-na maiko dakaha nie ra•na man•gen. Ian Assam a•dokosan ong•aigija India a•song gimikon tang•doatako man•gimin constituency ong•enga,” ine Sarma aganaha.
Adita salrangni gisepon a•songni Prime Minister Narendra Modi-ba Dhekiajuli-ona re•bae Charaideo aro Bishwanath a•ja damgnini medical college damgnina pangchakanirangko songe on•angna siengachim ine nikna man•a.
Assam a•dokni Assembly election-ko ia bilsini March ba April jani gisepon ong•atna siengachim.
