Guwahati, Feb 3: India a•songni Prime Minister Narendra Modi-ni Dhekiajuli-ona re•bana salsa skang, re•baenggipa February-ni 6 tariko Union Finance Minister Nirmala Sitharam, Assam a•dokona re•bagen.
Iani bidingo jinmana u•iatengon, Union Finance Minister Nirmala Sitharam, Assam a•dokona re•baenba, hajira ka•e cha•enggipa sak lak 8 manderangna sakprako gong 3000/- ka•e, Veterinary Science college-o suale on•anggen ine Assam-ni minister Himanta Biswa Sarma, da•al Budbar salni bako parakataha.
Ia bilsini budget-ko parakanio Union Finance Minister, da•o mikkang bilsi gittamna a•dokni kilometre 1300 national highway ramarangna gong kror 34,000-ko chame donatahachim. Assam aro West Bengal a•dokni cha baganrango kam ka•enggiparangni namgninaba ua gong kror 1000-ko parakatmanahachim.
Re•anggipa bilsioba da•o gita February jani gisepon Sitharam, Assam a•dokona re•bae program mingsao bakko ra•angahachim.
Ia bilsini gisepon Assam a•dokni Assembly election-ko ong•atna siengahani gimin batanggimin somoirangoba Modi aro Union Home Minister Amit Shah baksana BJP dolni dilgiparang bang•en Assam-ona re•batokengahachim.
Assam election-ni bidingo Election Commission, da•o ia February jani bichangchibara u•iataniko on•naba gnang ine ka•dongsoenga.
