Tura,Feb 3:Tura songjinma aro uni wilwilao dongenggipa gittimrangko namdapatna gita Budbar salo Tura DRDA conference hallo tom•e chanchirimaha.
Tom•e chanchirimanio West Garo Hills-ni Deputy Commissioner (DC) Ram Singh aro dingtang dingtang Department-ni Officer-rang, gittim antini Development committee-rang tom•anio dongpaha.
Sajinmana re•anggipa bilsioni skulrangko chipatani ja•mano, sajinma saanirang nambatroroangengahani gimin Tura songjinmao dongggipa pilak skulrang class 1-oni 5-ona kulina man•gnok, unbaksa Giljarango, bia ka•anirango aro mande jinma tom•dakgipa biaprango 75 percent bak ra•na man•gnok ineba ui•atjolaha. Uni gisepon re•anggipa January 16 tariko tikka su•aniko a•bachengatahaon, skanggipa chango an•seng baljokanina kam ka•giparangko aro a•songko nirok- simsakgipa ba chel•chakgipa sipai dolrangko tikka su•ani matchotataha. Indake gnigipa tikka su•aniko bang•gija salrangni gisepon a•bachengatgnok ineba DC aganaha. Sorkarini dongimin niam gitade Robibar salo anti ba bajar cha•aniko beng•kuan baksa night curfew-ko walni 11 bajioni pring 5 bajiona donangkugen.
Una agreba sorok rikamrango pala sim•anirangko, antiprako cha•gipa bajar antirangna agrede palna man•jawa aro garirangko skatang biaprango donanirangko nirokangkuenga.
Bajar jolrango gari dona man•dikengani gimin Tura Municipal Board (TMB) Public Work Department (PWD), Transport Office-ni manderang dingtangmancha chanchirime u•iataniko aro namdapataniko dakangchina Tura Traffic Police mol•molangaha.
Tura Town-ko nitoatna Ringrey, Upper Chandmari, Hawakhana aro Araimile-rango ja•achi re•gipa manderangna footpath-rangko MLA fund, Urban fund ba dingtang dingtang fund-rangchi tarie on•na chanchiengaha ine DC aganangaha.
Indake ong•engon Solid Waste Management dolni gita songdongenggipa manderangko jebasi jabolrangko skatang galramramjachina gitaba DC manderangko mol•molangaha.
Sports ba kal•chakram biaprangko namdapatna District Sports Office, nirokataniko dakangengaha jedakode chadamberang namgipa kal•chakram biapo kal•na aro ja•del bolchagimin manderang neng•take rona gita man•gen ineba aganangaha.
Sorkari street light ba rama sorokrango ching•atanirangko dakna tangka gong krol 1.7-ko on•e tariatengaha ine MeECL-ni SDO aganangaha.
