Agartala, Jan 29: South Tripura-ni Sabroom jolo, India aro Bangladesh a•songni gisepo sima kaaniko Border Guards Bangladesh (BGB)-ni sipairang champengeani ja•man dolgnini gisepo adita so•sojengjeng ong•anirangko nikna man•angaha.
Ia biapo adita so•sojengjeng ong•angani ja•man India a•songni Border Security Force (BSF), Bangladesh a•songni BGB baksa commandant-ni gadango tom•e chanchirimangenba, ia kamko chubata gadangni official-rang chanchirimchengchina dolgnian pakwate donangaha.
Official-rangni u•iatani gitade, Tripura sorkarini ning•o donggipa Public Works Department (PWD)-ni contractor-rangko adita salrangna skang BGB-ni sipairang, Sabroom-ni Ailmara jolo sima kaaniko champengeahachim.
“Iani bidingo BSF aro BGB-ni commandant-rang Budbar salo tom•e chanchirimahaoba chu•sokgipa ong•na man•jaha. Ia jolrango sima kaaniko BGB dol champengeani ja•man, jolo songdongenggipa manderangkoba ia sima ari jolrango mikrake dongchina u•iataha,” ine police official-rang parakataha.
BGB official-rangoni gital u•iatanirang sokbakujaskal ia biaprango sima kaaniko dontongatchengaha ineba official-rang parakataha.
India aro Bangladesh a•songni sima jolrango niam gri sam palbadinganirang aro ma•manti ong•gija dakgipa kamrangko nikna man•rongengani gimin adita salrangna skangsan a•songni damgnini gisepo chu•gimik fencing ba sima kachina gita Tripura a•dokni Chief Minister Biplab Kumar Deb, Union Home Minister Amit Shah-ko didiatahachim.
