Shillong, Feb 1: Bristibar salo, Meghalaya a•dokni Chief Minister Conrad K Sangma, Deputy Chief Minister Sniawbhalang, Dhar, Health Minister Ampareen Lyngdoh, PHE Minister Marcuise N Marak, Umroi MLA Damanbait Lamare aro dingtang dingtang dilgiparangni dongpaanio, East Jaintia Hills, Eastern West Khasi Hills, East Khasi Hills aro West Jaintia Hills a•jani dingtang dingtang block-rangna, Waste Collection e-Vehicles ba jabol chimonggipa garirangko a•bachengate on•angaha.
Jabol chimonggipa garirangko a•bachengate on•anganio a•dokni Chief Minister, jinmana aganprakangengon, India sorkarini ra•gatgipa Swachh Bharat Mission (Grameen) program-ara, a•songni pilak songrangkon Open Defecation Free (ODF) Plus ba bangbango skatang a•pal re•ani grigipa songrang ong•atna miksonganian ong•a ine parakataha.
Meghalaya a•dokko a•songo nambatsranggipa dam 10 a•dokrangoni damsa ong•atna gita a•dok sorkari aro department-ni rakbee kamrangko ka•enganichi, a•doko ODF Plus-ni 10 percent-oniko da•o 84.33 percent-ona tang•doatna man•aha ineba Chief Minister aganaha.
Ia jabol chimonggipa garirangko dingtang dingtang biaprango songdongenggipa manderangna suale on•aniara, a•doko songdongenggipa manderang baksa sorkarini ku•mong nangrime kam ka•na ja•ku de•chakatani ong•enga ineba ua aganaha.
Chief Minister-ni parakatani gitade, ia bilsionin a•bachenge, an•tangtangni jillarangko aro songjinmarangko rongtal an•tale rakkina gita district ge•anti, block ge•anti aro songantion, sorkari aro mande sakantian jagittamprako apsan nangrime an•tangtangko gital dake on•kangtaianikoba dakanggen.
Ia tom•anio a•dokni PHE Minister Marcuise Marak-ba jinmana aganprakangengon, ia jabol chimonggipa garirangko a•bachengatani aro suale on•aniara, Meghalaya a•dokko rongtalgipa a•dok ong•atna niksamsoaniko chu•sokatna sorkarini mongsonggipa ja•ku de•chakatani ong•enga ine parakataha.
Ia program-ko ong•atanio dingtangmancha bol 207 e-Vehicle-rangko, Khasi aro Jaintia Hills a•jani dingtang dingtang block-rangna sualataha.
Garo Hills-naba ia apsan dakgipa program-ko ja•mano ong•atangskagen ine official-rang parakataha.
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
