Jowai, Sept 20: Ia bilsini SSLC aro HSSLC porikkao pass ka•gipa chatro chatrirang, Class XI aro BA 1st Semester-o napna dorgastorangko galani ja•manoba bang•a chatro chatrirangan biapko man•tokkujaengani gimin Sombar salo, West Jaintia Hills a•jani Deputy Commissioner Garod LSN Dykes-ni office-o dingtangmancha tom•aniko ong•atangaha aro ia tom•anio Jowai-ni MLA Wailadmiki Shylla, Jowai-o donggipa dingtang dingtang college aro skulni principal-rang aro Education department-ni officer-rangba dongpae bak ra•angaha.
Tom•a matchotani ja•mano kobor ra•timgiparang baksa agangrikengon, BA 1st semester-ni History, Philosophy aro Economics gita dakgipa subject-rango honour-ko daknade ge 400-mangni gita bangbang ong•e dongenggipa seat-rang dongachim indiba admission-ko man•kugijagipa chatro chatrirangoni bang•batan ia subject-rangnade dorgastorangko galskajaha ine Jowai-ni MLA Wailad Shylla parakataha.
College aro skulrango section-rangko kulidapchina aro contract basis-o skigiparangko rakkidapchina gita uamang Education department-ko didigen ineba Wailad parakataha.
COVID-19-ni a•sel tangka paisani gita neng•nikanirangko man•na nangengani giminba bang•bata ma•a paarangan ia chango, an•tangtangni dedrangrangko sorkari skul aro college-rango admission-rangko ra•atna nangnikbattokaha ineba ua aganaha.
Iani bidingo ua sorkari baksa agangrike neng•nikaniko man•enggipa chatro chatrirangna dakchakna jotton ka•gen ineba Jowai MLA ku•rachakaniko on•angaha.
