Dibrugarh, Mar 30: Robibar salo, Jharkhand-ni Skotong Minister aro JMM-ni dilgipa Hemant Soren, Upper Assam-ni Dibrugarh a·jani Rajgarh Tea Estate playground-o cha bagano kam ka·gipa manderangni tom·bimonganiona re·angenba Tingkong Assembly-ni JMM candidate Mahavir Baske-ni election-o susaanina bakrimaniko mesoke jinmana parake aganangaha.
Ia rally-ara Jharkhand a·dokni a·palo JMM-ni dal·batgipa tom·bimongani ong·aha, aro iano uamang British-ni chasongo Chhotanagpur-oni katbae songdongegipa Santhal, Munda, Oraon aro Kurukh jatrangni lak 60-70 manderang baksa chaprimna ine miksonganio ong·atangaha.
Soren ia tom·bimonganiona adasurango bilbaaha aro Adivasi manderang aro cha bagano kam ka·giparang uko mande ra·bee rimchaksoaha.
“Assam-ni cha bagano kam ka·giparang kakket bichalko man·a nangana bate ru·ute sengaha. Na·simangni ma·gitcham-pagitchamrang ding·ol-gramchie ia baganrangko tarie Assam-ko silroro-namroroaona sokataha, indiba na·simang an·tangtangni man·gnirangna aro mande ra·anina dakgrikengkua,” ine Soren aganangaha.
Uandake ua hajirarangko komie man·anirang aro namgipa hospitalrang aro sanna-banani cholrang donggijanirangan mongsonggipa neng·nikanirang ong·a inenba, JMM uamangna a·paloni ong·e re·baja indiba uamangni saknaanirangna ku·rang on·nasa re·baaha ine ua janapangaha.
Uni agananirango uni mongsonggipa ku·chake on·aniara cha bagano kam ka·giparangna Scheduled Tribe ine channaniko man·na ru·uta somoirangoni dabienganiko chu·sokate on·gen ine agananian ong·a maina ia jatrang Jharkhand-ode ST ine channako man·a indiba uamangko Assam-ode Other Backward Classes inesa chanskaa.
“Cha bagano kam ka·gipa jatrangko ST ine changijaniara namen uamangko mande ra·gijani ong·a. Ian niam bidikni ning·o uamangni man·gniko on·gijani aro mandesal ine changijani ong·a. Assam assembly- JMM-ni donganichi ia dakgrikaniko chu·sokate on·gen,” ine Soren aganangaha.
Uandake Congress baksa bakrimna agangrikanirang chu·sokjahani ja·mano, April 9-o ong·nasienggipa sak 126 membor-rangni Assam assembly election-na JMM sak 21 candidate-rangko parakataha. Assam-ni cha bagan jolrangni constituency-rango Jharkhand-ni tribal politics-o pangchake bang·a manderangni bakrimaniko man·gen ine party-ni manderang ka·dongsoenga.
Pu·ongipa manderangko Baske-ko seokchina didienba, “Mahavir Baske-de na·simangoni saksaan ong·a. Ua na·simangni neng·nikanirangko chagrongaha. Uko assembly-ona watatbo, unode Assam-ni cha baganrango kam ka·gipa jatrangna an·ching gitalgipa salrangko ku·cholsan ra·bagen,” ine agandapangaha.
Pu·onani sal sokna skang upper Assam jolrangni cha baganrango JMM-ni campaign ka·arangoni Tingkhong rally-ba bak sa ong·a.
Na·simang iakoba nina man·gen:
Na·simang iakoba poraina man·gen: College of Agriculture Tura, M’laya-ni game ge·e cha·giparangna samgri strawberry jam tarianiko skie on·anga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
