Guwahati, Dec 11: Meghalaya a·dokni dingtang dingtang sanchakram biaprango am·sandie nianirangko dakanio pangchake, mingsa aiao inmananiko nikna man·aha: dolgni ma·giparangan bi·sa an·pakanio namedake matchotna man·genchimoba, songrango songdonggipa ma·giparang jillao donggipa ma·giparangna batede Respectful Maternity Care-ni (RMC) gimin u·ianirang bata.

Ia am·sandianiko Department of Community Health Nursing, College of Nursing, NEIGRIHMS-ni Gayatree Devi, Catherine Eva Myrthong aro K. Rosema Kom dakdilangaha aro ian RMC-ni bidingo u·iani aro uko jakkalanirangni bidingo songni aro jillani ma·giparangoniko skanggipa changna sandiani ong·a. Ia sandie man·aniko International Journal of Community Medicine and Public Health journal-o chapa ka·aha.

Uandake, ia am·sandianiko January 15 aro February 10, 2024-ni gisepo ong·atangaha, aro iani bidingo Shillong-ni Maternal and Child Hospital-oniko sak 60, aro NEIGRIHMS-oni 35 – 60 kilometre-mang chel·ao donggipa rural health centre-rangoni sak 60, chu·gimik sak 120 bi·sa an·pakdaldalgipa ma·giparangko sing·sandianirangko dakangaha. Iano pilak bak ra·gipa ma·giparangan ia survey-ko ka·ani sal 10-ni gisepo normal delivery gita bi·sa an·pakgiparang ong·a.

Poraia-skianiko niatgenchimode, sak 17 (28.3%) jillao donggipa ma·giparang upper primary-ko matchotgiminrang, aro sak 20 (33.3%) songo donggipa ma·giparang secondary gadangona sokgiparang donga. Bang·bata ma·giparangan kam ka·gija noko dongaigiparang ong·a, aro uamangoni 93.3% jillarangoni aro 95% songrangoni ong·a. Sak 49 (81.7%) jillao donggipa ma·giparang aro sak 42 (70%) songo donggipa ma·gipara Kristian toromko ja·rikgiparang ong·a. Unbaksana, sak 37 (61.7%) jillao donggipa ma·giparang aro sak 44 (73.3%) songo donggipa ma·giparang ma·ani nokoni ong·kate dingtang cha·giparang ong·a. Sak 35 (58.3%) ma·giparang an·o dongmitingo simsakani cholrangni ba RMC-ni gimin u·ija indiba sak 46 (76.7%) songo donggipa ma·giparang iani gimin u·ia.

“World Health Organization”-ni aganani gitade, respectful maternity care-ara (RMC) bi·sa an·pakani somoio ma·giparangko mande ra·na, aro u·iani gnang rai-rangko ra·na, sa·dika gri, kal·steka gri aro mamung miknengani gri simsake dakchakani cholko on·ani ong·a. December 207-o, India-ni “Ministry of Health and Family Welfare” labour room-ko namdapatna aro an·pakenggipa ma·giparangko mande ra·aniko gipatna “LaQshya”-ko a·bachengataha. An·pakenggipa ma·giparang aro atchidaldal bi·sarangni sianirangko komiatna, an·pakani somoio aro an·pakani ja·mano namgipa simsak-nirokaniko on·na aro sorkarini sanchakram biaprango sagiparangna dongtoani aro chu·ongnikaniko on·na ine krenganian LaQshya-ni miksongani ong·a.

65.8% magiparang respectful maternity care-ni gimin, chong·motan parak ong·atgijani, mande ra·ani, u·iani gnang rai-rangko ra·ani, mikkang nitegijani aro miknengoni naljoke dongna me·chikrangni bilrangni gimin u·ija. Jillao donggipa ma·giparang songo donggipa ma·giparangna bate u·ibatja: 23.3% jilla donggipa ma·giparangsan adita u·ianiko mesokaia, indiba songonide 45% ma·giparang iarangni gimin u·ia. Ia am·sandie nianio dingtanggrikanirang namen donga ine nikna man·a (p=0.012).

Data-ko niate nigenchimode, RMC-ni mongsonggipa bakrangni gimin u·ianirang dongja ine nikna man·a – jillao donggipa 18.3% aro songo donggipa 30% ma·giparang bi·sa an·pakani somoio mande ra·gijani ba miknengani dakbewalrangni gimin u·iaia. Una agreba, ma·gipani obostarangni gimin darangnaba parak ong·atgijani, mikkang nitegija sanna-bananirangni giminba u·ianirang komia.

Indake ong·genchimoba, 86.7% ma·giparang bi·sa an·pakanio namgipa obostarangko chagrongaha, aro iarangoba songo donggipa ma·giparang (90%) jillarango donggipa ma·giparangna bate (83.3%) nambata obostarangko chagronganirangko janapaha. Manderangni u·iani aro obostarangko chagronge nikani gisepo mamung nangrimani dongja: mande ra·gijani bewalrangko u·ijagenchimoba ba an·tangtangni bilrangko u·ijagenchimoba ma·giparang an·tangtangni chu·ongnikanirangko parakaha ine ia am·sandianio nikna man·aha.

Bi·sa an·pakani somoio ma·giparangna simsakani bidingo ma·giparangna u·ianiko on·anio nurse-rang namen nangchongmotgipa kamrangko ka·a ineba ia am·sandie nianio u·ina man·aha. 56% jillao donggipa ma·giparang aro 67.4% songo donggipa ma·giparang uamangni RMC-ni bidingo u·igimin pilakkon RMC-oniko knagimin ong·a ine senokgiparang janapaha.

U·ianirang chu·onggijanichi ma·giparang kragija ba mande ra·gija dake jakkalaniko man·naba gnang ine am·sandigiparang mikrakataniko on·aha – ia obostarangko India-ni dingtang dingtang biaprango nikna man·a aro 15% oni 98%-ni gisepo, an·pakmiting somoio mande ra·gijani aro kragija dake jakkalaniko man·a ine am·sandianirango parakata. Uandake uamang awareness programme-rangko bilakbate ong·atani, sagipa aro santimgipani gisepo nambate agangrikani aro songo aro jillarango donggipa sanchakramrango sanna-banani cholrangko namdapatna kamrangko ka·roroanirangko nange ine talataha.

Uandake an·o dongmitingo be·enko porikka ra·na re·baani somoirango ma·giparangna RMC-ni bidingo u·iatani, ma·giparangna namgipa gadango sanna-bananirangko dakani cholrangko nambatroroatani, aro ma·giparangna an·tangtangni namnikani ba namnikgijanirangko parakatani aro namdapatani cholrangko agane on·anirangko dakna cholrangko on·na nanga ine ia am·sandianio janapaha.

“Santimgiparangna skie on·anirangko dakanichi, songni-nokni manderang baksa bakrimanichi, aro namgipa gadango kamrangko ka·anichi, niamrangko dingtangatna kam ka·anichi, aro am·sandianirangko dakangkuanichi, an·ching pilakko mande ra·gipa, ka·sachakgipa aro ma·sichakgipa sanna-banani cholrangko on·na man·gen. RMC-ko u·ianichi bi·sa an·pakani somoirangkosan nambatataija indiba ma·gipana aro bi·sarangni an·seng-baljokaninaba nambata aro uandaken songsarnaba namgniko ra·baa,” ine senokgiparang parakataha.

Na·simang iakoba nina man·gen: 

Na·simang iakoba poraina man·gen: Minority tribal-rangna Regional Council-ko bikotna ine M’laya Governor-ni dakchakaniko bi·a

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub