Shillong, Dec 11: Meghalaya sorkari, Department of Arts & Culture-ni gita, Ministry of Tribal Affairs-ni ning·ao chang 4-gipa Tri Hills Ensemble-ko December 10 tariko, Ward’s Lake, Shillong-o oprake on·angaha. Ia manianio Khasi-rang, Jaintia-rang aro Gari-rangni jakchi tarigipa bosturang, dakbewalrang aro cha·nirangko mesokanirangko daka.
Ia tom·bimonganiona a·doknni skotong minister Conrad K. Sangma mongsonggipa sokgipa ong·e re·baaha. Arts & Culture-ni Minister, Sanbor Shullai; Adviser to the Government Paul Lyngdoh, Chief Secretary Dr. Shakil P. Ahammed, IAS, Principal Secretary, Arts & Culture Frederick R. Kharkongor, IAS, India-o Welsh Sorkarini skotong, India, British High Commision, Mumbai, Eoghan O’Regan aro gipin agipi dilgiparangba re·bae iano bak ra·angaha.
Ia chang manianio Darrang aro Dawki-o ring choani dakbewalrangko tangchaatpilna dingtangmancha ja·ku de·enga. Tom·ani a·bachengo dingtang dingtang dilgiparangko mande ra·aniko dakangenba, biota-rangko ring chogiparangni jako on·anirangko dake, ma·ambioni ranta ka·baenggipa chio kal·susaanirangko tangchaatpilna pil·taie krenganirangko mesokangaha.
Uandake, iandakgipa manianiko ong·ate gitcham salrangko gisik ra·tapilanina, an·chingni dakbewalrangni dingtang dingtang bakrangko ra·bae a·gilsakna mesokanina aro an·chingni manderangni ja·rikbaenggipa dakbewalrangko manianina aro mikkangchina ripinganina a·dokni skotong minister Conrad K. Sangma Department of Arts & Culture-ko mitele aganangaha.
Tri Hills Ensemble-ni gamchatani gimin ua talate on·enba, ia bilsini pangchakani, “Rivers, Roots, and Revival”, gimagimin dakbewalrangko tangchaatpilaniko mesoka jekai ring choani susaanirang jekon Dawki aro gipin biaprango ru·uta bilsirangna skang ong·atrongachim. Meghalaya a·doko janggi tangani gadangrang ta·raken tang·dororoenga, aro Tamil Nadu-ni ja·mande gnigipa biapo ong·enga ine ua aganenba, jatni dakbewalrangko ripinganiara silroro-namroroaniko ra·baanio dakna nangchongmotgipa ong·a ine talataha.
Uandake tribal jatrangni itihasrang, ku·sikrang, dakbewalrang, chrok-mesaanirang aro banoni re·baa, uarangni gimin ning·tubate am·sandie rakkian nangani gimin skotong minister aganangaha. “A·chik dakbewalmangmangon, dama dokani dingtang dingtang bewalrang aro Wangala-ni dingtang dingtang ja·ku de·anirang donga jekon dama dokgiparangsan u·ina man·aia indiba iarangni bidingo sandirikkite see rakkianirang dongja,” ine ua Chief Minister’s Research Grant-rangko jakkale ning·tubate am·sandianirangko dakna nanga ine janapaha. Chadamberangni gisepo rasong chaani aro nangrimaniko ra·bana a·dokni matgrikrang jekai Tirot Sing, Kiang Nongbah, aro Pa Togan Sangma-ni gimin dakmesokanirangko dakchina ua skulrangko didiaha. Bon·kame ua mikkangchi iandakgipa manianirangko bilakbate ong·atna ka·donganiko janape aro pilak ra·giparangna aro boksis man·giparangna an·tangni nama skaniko on·aha.
Ia maniani Khasi, Jaintia aro Garo manderangni dakbewalrang, ku·sikrang, doka-dam·anirang, cha·anirang aro jakchi tarigipa bosturangko man·e ra·aniko daka ine Minister of Arts & Culture-ba jinmana parakataha. Meghalaya Arts and Heritage Awards jatni dakbewalrangko ripinggipa manderang aro gital re·mikkanganiko dakgipa chadamberangkoba mande ra·a ine ua janapaha. Una agreba, jatni dakbewalrangko am·sandiani project-rang jekai Chief Minister’s Research Grant, mikkangchini chasongrangna jatni dakbewalrangko ripingna dakchaka ineba aganangaha.
Skangni dakrongbewalgipa ring chosusaaniko tangchaatpilaniko janape, ian me·asarang, chadamberang, dakmesokgiparang, dingtang dingtang bosturangko tarigiparang aro manianiko ong·atgiparangko damsan ong·ate jatni dakbewalko tange rakkina dakchaka ine aganangaha.
Sorkarini Adviser, Paul Lyngdoh, Tri Hills Ensemble-o ong·atenggipa a·dokni dakbewalrango pangchake dongimin dingtang dingtang dake nianirangni gimin talatanirangko dakaha. Artificial intelligence-ni chasongo chadamberangko uamangni itihas baksa nangrimatani gamchatani gimin ua agane, ua attamni bako dakmesokgiparang ma·gitcham pagitchamrangni gisik seng·aniko mesoka ine parakataha.
Chief Secretary Shakil P. Ahammed, IAS, itihas-ko u·ianiko archaeological research aro doka-dam·ani gamchatani gimin talatangaha. Research grant-rangni dakchakanichi jatrangni janggi tangani bewalrangko am·sandiani aro uarangni gimin u·iniko agane on·anichi mikkangchini chasongrangna ripingangna man·gen ine ua aganangaha.
Uandake, Chief Minister’s Research Grant ma·ambioni u·i-ma·siani, jatni dakbewalrang ba ranta ka·anirang, aro uarangko sandipilani aro uandakgiparangni bidingo am·sandianirangko dakgipa sak 48 scholar-rangko dakchakaha ine janapaha.
An·tangni jatni itihasni gimin u·ianiara pilak jatrangnan gamchata ine ua agangaha aro jattangni dakbewalrangko mande ra·na nanga, ong·telaigipa samtangtangko naljoke rakkina nanga, aro touristrangko rimchaksona nanga ine ua talate on·angaha.
Eoghan O’Regan, jinmana parake aganatengon, uko okamatanina dingtangmancha ia manianiko ong·atgiparangko mitelaha aro uni kam ka·anirangko a·bachengani somoio Shillongona re·bana cholko man·anina kusi ong·aniko parakataha. Meghalaya aro Wales-ni gisepo namen meligrikani gnang inenba, Khasi ku·sikko seaniko a·bachengatgipa Thomas Jones ia nangrimaniko mesokgipa ong·a ine Thomas Jones Day-ko ia biap damgnion mania ine aganangaha.
Khasi Hills-ni tangenggipa dakbewalrangko manianirangko janape, Wales-oba apsandakgipa donga jekon uamang “amarhid” ine agana, jeni ortoan “ianon ong·engkua” ine ong·a aro ian ku·siktango aro jattangni dakbewalo rasong chaaniko mesoka ine ua aganangaha. Khasi dokgipa-dam·giparangni Welsh harp-ko poraie ra·ani, aro Gordon Roberts Hospitalo uko sanna-bananio dakchakani gimin janape, ua Wales aro Meghalaya-ni gisepo changa-sapaniko skie ra·grikanirangni gimin aganangaha.
Ka·donggrikaniko ra·bagipa aro cholrangko mesokgipa project-rangna Welsh sorkari dakchakaniko on·gen ine ua parakate, ia manianiona re·bae an·tangni kusi ong·e, Khasi jatrangni dakbewalrang tangenggipa ong·a ine ua aganangaha.
A·bachengo, jinmana rimchaksoani kattako aganengmitingo, Principal Secretary Frederick R. Kharkongor, IAS, ia manianio chibimarang aro skangni dakbewalo ringrangko chosusaanirangko tangchaataniko mongsonggipa bak ra·e ra·enga ine talate on·angaha. Meghalaya-Wales-ni nangrimani gimin ua janape, ku·sik, cha·ani aro songsarni dingtang dingtang kamrangko ka·ani gimin talataha aro skanggipa Mega Arts and Heritage Awards-ko a·bachengataniko parakataha.
Ua Chief Minister’s Research Grant aro “Revisiting Our Roots” project-ni giminba janapaha, jean Khasi, Jaintia aro Garo jatrangni itihas aro ong·baani gimin dingtang dingtang a·songrang aro dolrang baka bakrime am·sandianirangko dakani bidingo a·bachengatgipa ong·a.
Dingtang dingtang dakmesokanirangkoba nikangna man·aha jekai Khasi Cymru-ni doka-dam·ani, Khatsaw Phra College-ni Ground Breakers-ni folk-tale musical aro State Institute for Arts & Culture-ni doka-dam·aniko dake jatgittamni aro a·ja dam chi·gnini gisepo nangrimaniko mesokangaha. Indian Council for Cultural Relations-ni dakchakanichi re·bagipa Bhutanese rock band Baby Floyd-ba git ring·anirangko dakangaha.
Attamo Meghalaya Culture & Cuisine Awards aro Meghalaya Arts & Heritage Awards-ni ning·ao Khasi ku·sikna kam ka·giparang, ma·ambini cha·a-ringanirangko tarigiparang, community library-rangko a·bachengatgiparang, jatni git aro doka-dam·anirangko dakgiparang aro a·dokni dingtang dingtang bosturangko jakchi tarigiparangna sakprakprakna aro dolrangna boksis on·anirangko dakangaha.
Chief Minister’s Research Grant-ni ning·ao tarigipa jawilwat Crafting Technique of the Saitar-ko mesokanikoba dakaha, CMRG portal-o donggipa research article-rang, online library membership registration, Rasong National Tribal Festival Report aro CMRG Report-rangko oprakanirangkoba dakangaha. Una agreba, Silbi Passah aro Khrawbok Shadap-ni janapanirang baksa Ana Notsu-ni segiminrangko Biate ku·sikona Anthony Durpui aro Ringmunfeli Nampui-ni pe·skagimin ki·tapko oprake on·anikoba dakangaha.
Na·simang iakoba nina man·gen:
Na·simang iakoba poraina man·gen: Jilla-o donggipa ma·giparangna baten songo donggipa ma·giparang an·tangtangni dakna man·gni bilrangko u·ibata ine gital am·sandianio man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
