Shillong, Sept 15: Budbar salo, Opposition Congress dolni dilgiparang Assembly-oni jinma ong•katgrimani bidingo janapatengon, a•songni dongimin niamo pangchake opposition dolrang ong•kate katna bil dongaia indiba judiciary-ni ning•o ba inquiry ong•enggipa kamrangni giminde Assembly-ni session-rango chanchirimna bil dongja ine a•dokni Chief Minister Conrad K Sangma parakataha.
Chief Minister-ni parakatani gitade, Parliament-rango aro Assembly-rangoba opposition dolrang, maiba kamni gimin suk ong•nikjagenchimode ong•katgrime jegalaniko mesokna man•aia indiba judiciary-ni ning•o ong•enggipa ba inquiry ong•enggipa kamrangni gimin session-rango chanchirimnade bil dongja.
Session-o maiba kamrangni gimin chanchirimna on•ani ba on•gijanide Speaker-ni jakosa ong•a aro Assembly-ni Speaker, Meghalaya Legislative Assembly-ni Rule & Procedure of Conduct of Business-ni Rule 59-o pangchakesa ia kamni bidingo chanchirimna on•jaha ineba Chief Minister talataniko on•angaha.