Shillong, Sept 15: Sorkarini kamrango manderangkoba bak ong•atpana gita Meghalaya sorkarini ra•gatgipa MyMeG program-ko Budbar salo, International Democracy Day-ko maniani bak gita a•dokni Chief Minister Conrad K Sangma, a•bachengate on•angaha.

A•doko namroro silroroani kamrangko ta•rakbatatna gita sorkarini kamrango a•doko songdongenggipa manderangkoba bak ong•atpana miksonganio sorkari, ia program-ko tariaha.Ia program-ko a•bachengate on•angani somoio a•dokni Chief Minister, jinmana aganprakangengon, batanggimin bilsi gittam atana sorkariko rikanio, a•doko pilakni gitan namroro silroroaniko ra•bana ia sorkari kamko ka•aha ine parakangaha.

2030 bilsini gisepo Meghalaya a•dokkoba a•song gimiko nambatsranggipa dam 10 a•dokrangoni damsa ong•atna miksongenga ine janapatengon, iako chu•sokgipa ong•atna gita MDA sorkari, game ge•e cha•giparangna, me•chikrangna, chadamberangna aro songsalni pilak dolrangnan namdapaniko ra•bana rakbee kamrangko ka•enga ine Chief Minister parakataha.

Meghalaya a•doko MyMeG program-ko a•bachengatahani gimin a•doko songdongenggipa manderangba da•o sorkarini kamrango agan-ku•pattianirangko on•e bakko ra•pana man•gnok ineba Chief Minister aganaha.