Shillong, Sept 28: Meghalaya a•dokni Kongthong songko Bollywood mikchanapchina gita ua ia songko taridapna nangnikenga ine Mongolbar salo Rajya Sabha-ni MP Prof Rakesh Sinha parakataha.
Sinha-ni parakatani gitade, ua Kongthong songko Jammu & Kashmir a•dokni Srinagar baksa tosusae nion, Kongthong songko nambate nikaha indiba ia biapona Bollywood-ni manderang re•bae jawilwatrangko tarina gita ia songko taridapna nangenga.
Manderangni daka rikani aro samtangtango ong•telaigiparangko ripinge rakkina gitasa ua ia songko jako ra•aha aro ia songko nisina gitade ua mamingkoba dakjawa ineba Sinha talataniko on•angaha.
Meghalaya a•dokni Chief Minister Conrad K Sangma-ko gronge agangrikani bidingo janapatengon, Shillong-oni Kongthong songona dakanggipa ramako taridapchina ua Chief Minister-ko mol•molaha aro ia ramako tarichina gita bakan CM ge•etaniko on•ataha ine Rajya Sabha MP parakataha.
Kongthong baksana Mawmang, Mawsohmad aro Sder songrangko jako ra•e nirokna gitaba ua bi•aha ineba Sinha parakataha.
Sinha-ni aganani gitade, ia jolo donggipa dam 12 songrang apsan bakrimenba, smu aro bija bitchi karkanarangko kulina man•gen aro ian ia jolo songdongenggipa a•brini manderangna bang•a namgni ong•gen.
Kongthong songko Sinha jako ra•e nirokna a•bachenga intalan da•o ia songko a•gilsak gimikchin mingsing minggamna a•bachengahachim ine nikna man•a.
Indake ong•engon, Kongthong song jolrango ku•simitani bewalrangko ja•riktokani gimin ia songo laboratory aro museum-ko kulina gita ua India sorkario mol•molaha aro iana a•dok sorkarini dakchakanikoba bi•enga ine Sinha parakataha.
