Williamnagar, Oct 24: East Garo Hills a•jani Dawagre-o Catholic Missionary-rangchi chalaienggipa Loyola School-o skanggipa changna Cultural Day-ko Sukrobar salo ong•ataha aro ia Cultural Day-ko ong•atanio, skulni chatro chatrirang, skigiparang aro ma•a paarangba gisiko nangbee bak ra•angtokaha.
Ia Cultural Day-ko ong•atanio, jatni ring•ani, doka dam•ani, cha•ani ringani, ganding chinding aro uandakgipa jatni dakbewal rikbewalrangko mesokangaha aro skulni chatro chatrirang aro skigiparangba, jatni ganding chindingrangko gane, a•songo donggipa dingtang dingtang jatrangni daka rikanirangko mesokangaha.
Ia program-ko ong•atanio jatni kal•susaanirangko ong•atangan baksana jatni cha•ani ringanirangko palna gita dokkanrangkoba donaha aro bang•a manderangan ia skulona re•bae, dingtang dingtang jatni cha•ani ringanirangko cha•e ringe nina cholko man•aha.
Ia Cultural Day-ko ong•atanio, Williamnagar-ni MDC Alphonsush R Marak, mongsonggipa sokgipa ong•e bak ra•angaha aro ia program-o ua jinmana aganprakengon, jatni daka rikanirangko ma•siatna aro chatro chatrirangni gisepo ku•mong nangrimaniko ra•bana gita ia Cultural Day-ko ong•atahani gimin Loyola School-ko mittelpilangaha.
A•chikrangni songsalo dingtangmancha me•chikrangko dal•bate ra•ani gimin agan-talatanirangko on•angengon, pagitcham ma•gitchamrangni donanggimin gun aro niamrangko pangnan rakkiangkuchina gita Marak, chatro chatrirangko aro ia program-o bak ra•gipa sakantikon didiangaha.
A•chikrangni gitcham golpo ‘Asi Malja’-ni bidingo toe aganangengon, ian an•tangtangna dal•batgiparangko mande ra•na aro uamangni agananirangko knachakchina mikrakatgipa golpo ong•a ine Marak parakataha.
A•songo dongimin niamrangko ja•rikchina gita didianiko on•angskaengon, A•chik jatni niam reti aro daka rikanirangkoba tangkame rakkina gita ripingchina aro ja•rikchina gita Marak, chatro chatrirangko aro tom•anio bak ra•giparangko ku•pattiangaha.
Ia program matchotani ja•man Williamnagar-ni MDC Alphonsush Marak, Hub News baksa agangrikengon, ia program-o bak ra•pana gita okamatahani gimin dingtangmancha skulni Principal Fr Victor D’Mello-ko mittelpilangaha. Chatro chatrirangni jatni ganding chindingrangko gane A•chik jatni nitoaniko dakmesokahani giminba ua an•tangni kusi ong•aniko parakataha. Pagitcham ma•gitchamrangni donanggipa jatni niam retirangko pangnan ja•rikchina gitaba Marak, Garo Hills-ni chadamberangko didiataha.
Ia Cultural Day-ko ong•atani bidingo Loyola School-ni Principal Fr Victor D’Mello, talate on•angskaengon, ia gital chasongo jattangtangni dingtanganiko aro jatni daka rikanirangko ripingna nangani gimin chatro chatrirangna gisik ra•ataniko on•na gita ia program-ko ong•ataha ine parakataha. Ia sal somoirango jatni chrok mesaani, jatni dakbewal rikbewal aro ku•sikrangkoba gualangtokengaha ine janapatengon, iandakgipa program-rangko ong•atachi, jatni mikkim rasongko tangatpilna man•gen ine Fr D’Mello, an•tangni ka•dongchakenganiko parakataha. Ian skanggipa changna Loyola School-ni gita Cultural Day-ko ong•atani ong•genchimoba namen chu•sokgipa ong•aha ineba Fr D’Mello aganaha.
Ia Cultural Day-ona re•bae ma•a paarangba an•tangtangni kusi ong•aniko paraktokaha aro iandakgipa program-rangko ong•atachi, uamangni dedrangrang, jattangni daka rikani aro niam retirangko ma•sina aro mande ra•na dakchakgen ine aganaha.
Na·simang iakoba nina man·gen:
Na·simang iakoba poraina man·gen: Hindi’-an India a•songni ku•sik ong•a ine KHADC session-o VPP-ni MDC agananga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
