Tura, Jan 18: Budbar salo, All India Trinamool Congress (AITC)-ni chairperson aro West Bengal a•dokni Chief Minister Mamata Banerjee, North Garo Hills a•jaona re•baaha aro uko Opposition AITC-ni dilgipa Mukul Sangma, Meghalaya AITC-ni state president Charles Pyngrope aro AITC-ni gipin dilgiparang rimchaksotokaha.
Mendipathar-ni Dilma A•pal kal•chakramo AITC-ni chairperson, hajal kotok manderangna aganprakangengon, TMC dolmangmangsan namgipa sorkariko ra•bae, a•dokni chadamberangna, chatro chatrirangna aro me•chikrangna nambata janggi tanganiko on•na man•gen ine ia chang Assembly election-o TMC-ko seokchina, tom•anio bak ra•gipa manderangko didiangaha.
West Bengal sorkarini ra•gate on•gipa ‘Lakhshmir Bhandar’ scheme-ni bidingo janapangengon, ia scheme-ko Meghalaya a•dokonaba ra•bae uamang, nokdang ge•antini me•chik sakpraknan gong hajalprakko on•na sienga ine West Bengal-ni Chief Minister parakataha.
NPP-chi dilgipa MDA sorkariko matnange aganangengon, batanggimin bilsi bongani gisepo ia sorkari maming kamrangkon a•dokni manderangna chu•sokate on•jaha ine Banerjee parakataha.
AITC-ni chairperson Mamata Banerjee baksana AITC-ni national general secretary Abhishek Banerjee-ba North Garo Hills-ona re•bapaaha aro ia tom•anio uaba jinmana aganprakangengon, TMC-na chakpaaniko on•engani gimin Meghalaya a•dokni manderangko mittelpilangaha.
Garo Hills gimikon manderangni TMC baksa bakrimenganiko nike, ia chang election-o NPP, seat damsakoba chena man•janaba gnang ineba Banerjee parakataha.
Ia election-o TMC-ko seoke sorkariko rikna cholko on•genchimode a•doktangni manderangan sorkariko chalaigen ineba AITC-ni national general secretary aganaha.
