Shillong, Sept 22: Panachayati Raj aro ma•mong sorkarini dingtang dingtang scheme-rangni bidingo chanchirimna gita Budbar salo Panchayati Raj-ni Union Minister of State Kapil Moheshwar Patil baksa Meghalaya a•dokni dilgiparang, Shillong songjinmao tom•aniko ong•atangaha.Ia tom•anio Meghalaya a•dokni District Council Affairs Minister Lahkmen Rymbui, C&RD Minister Hamlet Dohling, KHADC-ni CEM Titosstar Chyne, Principal Secretary Sampath Kumar aro gipin official-rangba dongpae bak ra•angaha.

Ia tom•anio KHADC-ni chief executive membor (CEM) Titosstar Chyne, ma•mong sorkarini ra•gatgipa dingtang dingtang scheme-rangni gimin janapangengon, batanggimin adita salrangni gisepo ia scheme-rangni bidingo adita jajaanirang ong•kataha ine parakangaha.

Meghalaya a•dokara Autonomous District Council (ADC)-ni ning•osa ong•a aro Panchayati Raj-ni ning•o ong•ja ine talataniko on•angengon, 15th Finance Commission-ni ning•o on•enggipa pilak scheme-rangan ADC-rang gitasa re•bana nanga ua parakangaha.

India sorkarini on•enggipa scheme-rangko ADC-rang aro songko nokko dilenggipa Nokma Sanerangsa jako ra•na man•na nanga ineba Chyne aganaha.