Shillong, Oct 12: Mawphlang Assembly constituency-ni bye-election-ko ong•atanio Hill State People’s Democratic Party (HSPDP)-ba United Democratic Party (UDP)-ni candidate Eugeneson Lyngdoh-ba kamko ka•gen ine Mongolbar salo HSPDP-ni president KP Pangniang parakataha.Pangniang-ni u•iatani gitade, Mongolbar salo HSPDP central executive committee-ni tom•aniko ong•atangenba, Mawphlang bye-election-o UDP-ni candidate-na kamko ka•na gita tik ka•angaha.

Mawphlang bye-election-o HSPDP dolni gita, UDP-ni candidate-na kamko ka•na tik ka•manahani gimin, ia election-na kamrangko ka•sona gita ta•raken Regional Democratic Alliance (RDA)-ni tom•aniko ong•atna nanga ineba HSPDP-ni president aganaha.

Meghalaya a•dokni bilsi 50 gapaniko manina siengahani gimin Meghalaya a•dokni jakgitelanina jak on•pae kam ka•gipa dolni dilgiparangko dingtangmancha mande ra•pilskana gitaba ia tom•anio HSPDP-ni dilgiparang tik ka•angaha ineba Pangniang parakataha.

Pangniang-ni u•iatani gitade, HSPDP-ni dilgiparangna aro volunteer-rangna re•baenggipa November 10 tariko dingtangmancha mande ra•pilskaaniko dakanggen.