Shillong, Jun 4: Meghalaya a•dokni skanggipa ‘sailing yacht’ ba chongipa jahas ‘Meghalinor’-ko Budbar salo, a•dokni Chief Minister Conrad K Sangma, Umiam Lake-o a•bachengate on•angaha aro ia program-ko ong•atanio, a•dokni Tourism Minister Paul Lyngdoh, Tourism department-ni Commissioner & Secretary Vijay Kumar D aro Tourism-ni Director CV Diengdoh-ba dongpae bak ra•angaha.
Ia yacht ba chongipa jahasko a•bachengate on•anganio a•dokni Chief Minister, jinmana aganprakengon, ia chongipa jahasko a•doko a•bachengataniara sorkarini mongsonggipa Tourism aro Sports department-rangko apsan miksonganio ra•baengani gimin ian manderangna janggi tangani cholrangko on•na aro chadamberangna kal•susaanio cholrangko ra•bae on•ani gita ong•enga ine parakataha.
Meghalaya a•doko songdongenggipa manderangoni 50 percent-mangni gitade bilsi 20-na komigiparangan ong•ani gimin sorkari, chadamberangni nangani kri kamrangko ka•na miksonganirang donga ine janapatengon, mikkangchi chadamberangna dingtang dingtang cholrangko on•na gita sorkari, chadamberangna pangchakanirangko songe on•angna nangenga ine Sangma aganaha.
Umiam Lake-ko chengonin mingsing minggamgenchimoba ia chibolni chu•gimik cholrangko jakkalna man•kujaengachim ine janapatskaengon, iandakgipa cholrangko ra•e sorkari, ia jolrangko a•songo nambatsranggipa resort-rangoni damsa ong•atna gita ia Umiam Lake-o chini kal•susaanirang aro chongipa jahasrangko choatna kamrangko a•bachengataha ine Chief Minister parakataha.
Ian chonbegipa a•bachenganisan ong•genchimoba mikkangchi ian tourist-rangna nambatsranggipa rochakani biap ong•na man•gen ineba ua an•tangni ka•dongchakenganiko parakataha.
Batanggimin chang National Games-o kayaking aro canoeing kal•susaanirango Meghalaya a•dokna mikkim rasongko ra•bagipa manderangko mittelpilangskaengon, mikkangchi ia Umiam Lake-an a•doko chini kal•susaanirangko sokachakgipa biap ong•na man•gen ine Sangma aganaha.
Na·simang ia video-koba nina man·gen:
Na·simang iakoba poraina man·gen: Shillong-o rikna sienggipa IICA-ni gital Campus-ko ta·raken a·bachengatgen
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
