Guwahati, Dec 12: Meghalaya-o sam-bolrang aro do·o-matrangko ripingna kam ka·anina mingsinggipa Betsida Ch. Marak-na, uni hurorangko naljoke rakkina kam ka·dilanina aro ong·telaigipa samtangtangrangko nirokgiparang ong·na songni manderangko krengdilanina, 13-gipa Balipara Foundation Awards-o Green Guru Award-ko on·angaha.
13-gipa Balipara Foundation Awards-ni tom·bimonganiko December 11 tariko Guwahati-o ong·atangaha aro India-ni Salgro Salaram-o do·o-matrang aro ong·telaigipa samtangtangrangko nirok-simsakanina dingtangmancha krenge ka·giparangko mande ra·aniko dakangaha. Assam-ni Kazirang King Cobra Team aro Nagaland-ni H. Zhimo-ba uamangni on·kange kam ka·anirangna mande ra·aniko man·aha.
2013 bilsi dipetoni, Balipara Foundation, Himalaya-ni Salaram jolrango donggipa ong·telaigipa gam-jinrangko naljoke rakkina aro nitoatpilna ine dingtang dingtang cholrangko ra·e neng·takgija kam ka·enggipa manderangko manderangna parakatenga aro dakchakanirangko on·enga.
HURO Programme-ni saksa mongsonggipa member ong·e, Marak India-o gimana kengniko man·engipa hurorangko uarangni dongramona sokatpilna, uarangni cha·ani-ringani aro nanganirangko u·ianiko gipatna aro samtangtangko naljoke rakkiani gamchataniko manderangna gane on·na bilsi chikkungna baten kam ka·engaha. Uni krenge kam ka·anirangchi ma·ambioni u·ibaanio pangchake, scientific bewalo simsakani aro songni-nokni manderangni bak ra·aniko dondime ripingani kamrangko ka·anio dakchakaha.
Marak an·tangni song Silsotchigre-oni songni-nokni manderangko kam ka·dilanichi India-o mongsongbate gimanasienggipa hurorangko naljoke rakkianio niksengbatgiparangoni saksa ong·aha. 2010 bilsio HURO Programme-o bak ra·aoni dipetan ua jokatgimin a·gilsako bang·batgipa jokatgimin hurorangni dongchakram Sonja Wildlife Rescue Centre-ko nirokaha. Uni simsak-nirokanichi, rim·srukako man·gipa, sikar ka·gipa aro mata-buako man·gipa hurorangko dongramtangona watpilatna skang namedake aro ru·uta salrangna nirokanirangko dakaha. 2016 bilsio, jokatgimin huro jorasako burungona watatpulaha – aro ian uni scientific aro biapni dakbewalo pangchake kam ka·aniko mesokgipa mingsa mongsonggipa sakki ong·a.
Dingtang dingtang nokdangrang, chadambe dolrang aro Meghalaya-ni dingtang dingtang songrangni dilgiparang baksa bakrime kam ka·anichi ua samtangtangko ripinganina mikrakataniko on·anio bilakbegipa saksa ong·aha. Ua A·chik aganritingbaanirango pangchake Huro-ko mande ra·a aro uko sikar ka·ani aro uarangni dongramko nosto ka·anirangko dakna beng·a.
Sonja Wildlife Conservation Middle School-ni principal ong·e, u asak 160 kangal-cholgri nokdangrangni chatro-chatrirangna indin poraina cholko on·a aro uano ong·telaigipa samtangtang, do·o-matrangko naljoke rakkiani, sikar ka·ani namgijani gimin skie on·ani aro ong·telaigipa samtangtangrangni gimin skie on·anirangko daka.
Ia award-ko on·anichi uni nama kamrangko a·gilsakni dingtang dingtang biaprangonaba gipata. October 2024-o Marak, uni hurorangko naljoke rakkina kam ka·anina aro Meghalaya-ni burung-bolgrimrangko ripingna chadamberang baksa bakrimanina IUCN Primate Specialist Group-o skanggipa changna a·gilsak gimiko niksengataniko man·aha.
Na·simang iakoba nina man·gen:
Na·simang iakoba poraina man·gen: Manipur a·doko tom·aniko ra·bana aro pilakni gitan namroro silroroatchina President Murmu didia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
