Shillong, Sept 1: Jabrini ja·man Meghalaya a·dokni dingtang dingtang biaprango manderangni rochakgipa biaprangko kulipilahaon, dingtang dingtang biaprangoni re·bagipa manderangko ia biaprango roanirangko nikna man·aha.
Meghalaya a·doko manderangni rochakgipa biaprangko sorkari, tika su·mangimin manderangna September 1 tarik dipet kulipiltaiatahachim. Tika ponggniko su·mangimin manderangde ia biaprango napna gita porikkarangko ra·e nina nangjahachim indiba tika pongsako su·gimin aro tika su·sranggijagipa manderangde ia biaprango napna gita RTPCR-chi test ka·e negative ong·ani report-ko mesokskana nangachim.
A·doktangni manderangba tika su·srangkugijagipa manderangde RTPCR-ni negative report-ko mesokna nangenga indiba tika pongsako su·gimin manderangde iandakgipa report-rangko ba porikkarangko ra·na nangskajahachim.
Budbar sal dipet a·doko tourism-ko kulipilahaon, a·dokni mingsinggipa biaprang, jekai Ward’s Lake, Lady Hydari Park, Dawki aro uandakgipa biaprango manderangni roanirangko bang·en nikna man·aha.
