Shillong, Jan 26: Meghalaya a·dokni Governor Satya Pal Malik, Mongolbar salo a·songni nisanko Shillong songjinmani Polo Ground-o badale on·angenba salam ka·angaha aro ia Republic Day-ko manianio a·dokni Chief Minister Conrad K Sangma-ba dongpae bak ra·angaha.
A·songni chang 72-gipa Republic Day-o Meghalaya a·dokni manderangna namgipa skaniko on·angengon, “Ia salo an·ching an·chingni ku·cholsan ong·ani gamchataniko mittelpilna aro a·songni jakgitelani, ku·mong nangrimani aro apsan ong·ani gunrangko rakkiangkuna gita an·tangtangko on·kangtaina,” ine a·dokni Governor parakataha.
Meghalaya a·doko niam retirangko rakkiani bidingo janapatengon, “A·doko pilakni gitan da·ororo tom·tomaniko nikna man·enga aro ia bilsi 10-ko an·ching Meghalaya-ni chasong ong·atna ku·rachake aro niksamsoe a·bachengaha. Ia bilsi 10-ni gisepo an·ching Meghalaya a·dokko India a·songo nambatsranggipa dam 10 a·dokrangoni damsa ong·aniko nikna sienga,” ine Governor aganaha.
Namroro silroroani bidingo janapangskaengon, “Sabisirang an·chingni gisepo giprorogenchimoba an·chingni bang·bata kamrangan chu·sokgipa ong·baenga ine anga aganna kusi ong·a indiba batanggimin bilsisani gisepo an·chingni chu·sokbatsranggipa kamara sabisini giproroaniko champengna man·anian ong·aha. Sabisiko man·giparangoni aro sabisi man·e sianggiparangoni Meghalaya a·dokba komibatsranggipa a·dokrangoni damsa ong·engpiti,” ine Governor aganaha.
Doctor-rang, health department-o kam ka·enggipa gipin manderang, police, municipal, district administration aro gipin dolrangko man·chape sabisiko warachakna mikkango donge kam ka·giparangko mittelpilangengon, “India a·songo tarigipa tika minggniko man·e an·ching a·songko ‘a·gilsakni sam dokkan’ ine mesoktaina man·aha. India a·songni manderang ong·e an·ching iana rasong chana kraa aro ia chu·sokanina anga Meghalaya a·doko songdongenggipa manderangni pal, mande ra·ako man·na kragipa India a·songni Prime Minister-ko mittelpilna ska,” ine Governor parakataha.
Samtangtangko tange rakkianian an·chingni mikkangchina ka·dongani ong·enga ine janapatengon, “A·gilsak gimiko mikka wabatsranggipa aro 75 percent-na baten buring bolgrimrang gapgipa a·dok ong·genchimoba a·doko chirangko chu·onga gita man·kujaenga. Meghalaya a·doko State Water Policy dongaha aro da·o china neng·nikaniko namatna gita bakan Meghalaya Water Mission-ko a·bachengatgnok,” ine Governor parakataha.
Meghalaya a·doko sorkarini dingtang dingtang kamrangnaba ua a·dok sorkariko mittelpilangaha.
Ia Republic Day-ko maniani somoio Meghalaya Award 2021-ni ‘U Tirot Sing Award’-ko Raphael Warjri-na, ‘Pa Togan N Sangma Award’-ko Rev Dilseng M Sangma-na aro ‘U Kiang Nangbah Award’-ko Hame Shaniah Suiam-na a·dokni Governor Satya Pal Malik-ni jakchi on·angaha.
Tableau display competition-o chegiparangna a·dokni Chief Minister Conrad K Sangma, trophy-rangko on·angskaaha aro mikkango donge sabisiko warachakenggipa manderangnaba uni jakchi certificate-rangko on·angjolaha.
