Tura, Apr 21: Tura-ni Danakgre-o donggipa Montfort Centre for Education-o Montfort Teacher Training College for Special Education-ni bilsi 25 gapaniko manianio, Meghalaya a•dokni Chief Minister Conrad K Sangma-ba dongpae bak ra•angaha.
Ia program-ko ong•atanio, Tura-ni Bishop Andrew R Marak, Rev Bro Dr Maria Soosai, Rev Bro Dr VK George aro gipinrangba bak ra•angtokaha.
Ia tom•aniko ong•atanio a•dokni Chief Minister, jinmana aganprakangengon, Montfort Centre-ko kuliani bidingo gisik ra•atpilangenba, bilsi 25-na skang ia Montfort Teacher Training College-ko PA Sangma sagian nokdonggae on•ahani gimin da•alo ia manianiona ua re•bae bakko ra•na nangnikaha ine parakataha.
Ia college-ko kulichengani somoio salgro salaram jol gimikon special education-ko on•gipa training institute-rang damsaba dongkujachim aro ia Montfort Teacher Training College-an skanggipa institute ong•aha ineba Chief Minister aganaha.
Ia sal somoirango salgro salaramni dingtang dingtang biaprango iandakgipa institute-rangko da•o bang•en kuliaha ine janapatengon, special education-ko on•anio Montfort College-an gitchambatsranggipa aro nambatsranggipa institute-rangoni damsa ong•enga ine Sangma aganaha.
Special education ba be•enni gita cholgri ong•gipa manderangna bida budi on•aniko bang•a manderangan bal boja gitasa ra•genchimoba Montfort gita dakgipa institute-de iako dangdike on•anichi dingtanganiko ra•baani chol gitasa ra•skaaha ine Chief Minister, mittele aganaha.
Sorkarini Meghalaya Outcome Transformation in Health, Education, Rural Development & Social Welfare ba MOTHERS program-ni bidingo janapangengon, ian songadam nokadamrango dingtanganiko ra•bana gita ma•giparangni daitoko jangchio done, dingtang dingtang department-rangni kamrangko chaprimgipa program ong•a ine Chief Minister, talataniko on•angaha.
Songni nokni manderangna dangdike on•anio dingtang dingtang Mondolirangni kamrangkoba Chief Minister mittelpilangaha.
Ia program-ko ong•atanio Rev Bro Dr Maria Soosai aro Rev Bro Dr VK George-ba jinmana aganprakengon, batanggimin bilsi 25-na Montfort Centre-ni bida budi on•anirangko janapangaha.
Na·simang iakoba nina man·gen:
Na·simang iakoba poraina man·gen: Deficit skul aro college-rango kam ka•giparang Pension Scheme 2026-ko jegala
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
