Shillong, Dec 2: Karkanarangni jabolrangna bate songjinmaoni mitchigipa jabolrangsa samtangtangko mitchiatbatenga ine Meghalaya State Pollution Control Board jajrengchakani kattarangko parakaha.
Bilsiantian December 2 tariko National Pollution Control Day-ko manirongenga aro ia salko maniani miksonganian manderangna mitchiatgipa jabolrangchi samtangtangna nosto ong•ataniko ra•baani bidingo mikrakatan baksa ui•ataniko on•na miksongani ong•enga.
Ia salko manianio Meghalaya Pollution Control Board-ni a•gipi Environmental Engineer W. R. Kharkrang-ko gronge agangrikon, “An•ching bang•a somoion karkanarangko donanichisa samtangtangna mitchiatgipa jabolrangko ong•katata ine ma•sisretronga indiba iarangni gimin che•em che•em sandianiko dake niora karkanarangoniba mitchiatgnirang ong•kata indiba songjinmaoni jabolrangsa samtangtangkode nosto ka•bata aro iana simsakna nangani an•ching sakantini jakon ong•a,” ine ua aganaha.
Jabolrangko jebasi simsakgija galani bidingo aganengon, “Chingni official-rangko jabol galani bewalrangko mongsongbate chiringrangona jol galatanirangko bon•atna kam ka•china ja•ku de•ataha indiba an•ching sakprakprakan daiko ui•e noktangtangonin jabol galani nama bewalko ja•rikosa chu•sokgipade ong•na man•aigen,” ine Pa Kharkrang aganaha.
“Haida jabolko an•tangni subida gita galatanio nengrabatnaba gnang indiba ian chiring chibimana aro uo gnanggipa jonturangna namjabea apsan daken an•ching mande jatnaba sabisiko on•na man•a. Uni gimin samtangtangna ka•saaniko ka•tongo done aro iako an•chingni janggi tangani namgipa bak dake ra•e sakprakprakan jabolko galaniko simsakbena nanga,” ineba mol•molani kattarangko Pa Kharkrang agandapaha.
