Tura, Dec 2: South West Khasi Hills a•jani Kalapahar, Rajai aro Cheragao songrango koelarangko cho•anichi aro mikkarang waanichi ramarang nosto ong•atako man•tokaha ine South West Khasi Hills a•jani United A•chik Youth Federation (UAYF) parakatenba, ia ramarangko taripile on•china gita Ranikor civil sub-division-ni Civil Sub-Divisional Officer (SDO)-ko didiataha.

“Ia songrango donggipa a•brirangoniko ru•uta bilsirangonin koelarangko bikotengani a•sel wachini somoirangode a•arang rurongbae chiringrango be•dapaha aro wachini somoio chiringrang joksrue ia rama jal•langrang aro manderangni bagan barirang nosto ka•ako man•tokaha,” ine UAYF-ni president Sanggra Marak parakataha.

UAYF-ni parakatani gitade, a•brirangoniko koela bikotengani a•sel a•arang rurongbae rama jal•langrang nosto ka•ako man•enga aro ia jolo donggipa border fencing-ba nosto ong•atako man•tokahachim.

“Ia ramarang namen namsrangjahani a•sel songni nokni manderang aro ramako re•ruraenggipa manderang neng•nikanirangko chagrongna nangtokenga,” ine UAYF-ni president parakatenba, ia rama jal•langrangko ta•raken taripile on•china Ranikor civil sub-division-ni Civil Sub-Divisional Officer (SDO)-ko didiataha.