Shillong, Jan 18: Meghalaya-ni buring-bolgrim aro a·bri-a·kongrangko ja·achi rorame pilakni gimin skie ra·anirang baksana uarangni gimin u·i-ma·sie ra·anirangko dakna gita, India gimikoni NCC-ni sak 500 mang cadet-rang bakko ra·angatokachi batanggimin adita salrangna skang NCC-ni ong·atanggipa Meghalaya NER Trek -1 ba All India trekking expedition, mija Sombar salo Shillong-o name matchotangaha.

Trekking expedition-ko matchotatani salo, camp fire-ko ong·atenba dingtang dingtang jatni daka-rikanirangni bidingo dakmesokanirangko namen an·saobee ong·ataha, jeon India gimikoni re·bae bakko ra·egiparang a·doktangtango chrokanirangko chroke mesokanga baksanaba gipin a·dokrango chrokanirangkoba chroke mesokangtokaha.

Buring roromani somoio, pilak bakko ra·gipa cadet-rangni gisepo mongsongbate biapni gimin u·i-ma·sie ra·arangni giminsan gisiko dongbataioba, a·songni gipin biaprangoni re·bae bakko ra·pagipa sakgipin cadet-rang baksa gronggrikna aro meli-nangrimna gitaba namgipa cholrangko man·jolaha.

Bon·kamgipa tom·bimonganiko ong·atangani attamo, NCC NER Directorate-ni pilak gadangrango donge dangdike on·enggiparang, officerrang, aro NCC Shillong group-rangni dongpaanio, India sorkarini Commissioner Secretary Dr B D R Tiwari baksana NEHU-ni Registrar Pa S K Dixit-maang bakko ra·e programko mikkim gnangataha.