Shillong, Jan 23: British-rangni jakchi sason ka·oniko India a·songko jakgitelatna dakgrikdilgipa Netaji Subhas Chandra Bose-ni atchiani bilsi chang 126-gipako Parakram Diwas dake a·song gimiko manianga gitan Meghalaya-ni skotong Shillong-oba apsandake Sombar salo maniangaha.
Netaji Subhas Chandra Bose Jayanti ba Netaji Jayanti, ian a·songna janggitangko on·chakgipa Netaji Subhas Chandra Bose-ni atchiani salko gisik ra·na India a·song gimiko January 23 tariko Parakram Diwas dake manibaenggipa ong·a aro bilsianti manirongenggipa Netaji Jayanti-ko, batanggimin 2021 bilsioni dipat, chang 124-gipa atchiani salko maniango Parakram Diwas dake a·songo skanggipa changna manibachengaha.
A·songtangna sichakgipa dal·gipa mandeni atchiani salko gisik ra·e Parakram Diwas-ko a·songo manianganio, Sombar pringchibara, Meghalaya-ni skotong Shillong-ni State Central Library-o chonbegipa programko ong·ate manianga baksana salpaksachibara Shillong, Jail Road-oba maniangpaaha.
Ia manianiko, Netaji-ni a·songtangna kakket ka·saani aro on·kanganirangko nipilatenba uni kamrangko mande ra·na gita miksonge ong·ataha. Ia dingtangmanchagipa salara, Netaji sagini bang·a sinjetanirangko man·genchimoba uni a·songtangna kakketani, on·kangani, chu·sokna jotking dakani kamrangko uoniko skie ra·china gita a·songni pilak chadamberangko didianiba ong·jola.
