Tues, Jan 23: National People’s Party (NPP)-ko bikotdilenggipa Purno A Sangma sagi, skango jekai election changantian Adokgre songoni campaign ka•aniko a•bachengrongachim, apsan daken ia chang Meghalaya Legislative Assembly election-naba NPP-ni campaign ka•aniko uni depante aro NPP-ni national president Conrad K Sangma, North Garo Hills a•ja ning•o donggipa Adokgre songonin a•bachengattaiaha.
PA Sangma sagini somoio ua pangnan Adokgre songoni election campaign ka•aniko a•bachengatenba, chegipa ong•rongahani gimin ia songko ua ka•sabee ‘Chenanggre’ ine mingangahachim aro uandaken uni minge donanggipa bimingchi dingtangmancha ia songo ‘Chenanggre Stadium’-ko NPP-ni dilanichi rike on•aha aro ia stadium-ko adita salrangna skangsan, PA Sangma-ni depante aro a•dokni Chief Minister Conrad K Sangma kulie on•angskaahachim.
NPP-ni campaign ka•aniko a•bachengatna gita tom•bimonganio NPP-ni national president aro Meghalaya a•dokni Chief Minister, jinmana aganprakangengon, NPP aro uni kosako Trinamool Congress (TMC)-ni matnanganirangna TMC-ni lekkaonikon aganchakaniko on•angaha.
West Bengal election-o jekai TMC, BJP-ko gipin biapni party ine matnangahachim apsan daken ia tom•bimonganio Sangma, TMC-ko gipin biaponi re•bagipa political dolsa ong•a aro gipin biaponi re•bagipa dolko Meghalaya a•dokni manderang ra•chakna man•jawa ine parakatskaaha.
TMC-ni dilgipa Mamata Banerjee skango, uni pagipa PA Sangma sagiko mande ra•bee chakpaanirangko on•ahani gimin ua an•tangba Mamata Banerjee-ko ra•skaa ine janapatengon, politics-ni gitade TMC-ara Meghalaya a•doko gitalsa ong•kuenga aro uamang Meghalaya a•doko somoiko nangkugen ine Conrad Sangma parakataha.
Meghalaya a•doko da•o TMC-ko dilenggiparang pilakan Congress dolni gitcham dilgiparangsa ong•e ua somoion Meghalaya a•doko namroro silroroaniko ra•bana cholko man•ahachim indiba gisiko skanirang dongjae uamang chu•sokgipa ong•jaha ineba Sangma parakataha.
Ia tom•bimonganio a•dokni Deputy Chief Minister aro NPP-ni national vice president Prestone Tynsong-ba jinmana aganprakengon, PA Sangma sagini kamrangko gisik ra•e NPP-ko seokchina gita Garo Hills-ni manderangko didiangaha.
