Resubelpara, Dec 9: North Garo Hills a·jao ong·atenggipa A·we Festival 2025, dingtang dingtang mongsonggipa manderang, chatro chatrirang, bading chiwalgiparang aro jolo donggiparangni bak ra·paanio ga·suprete a·bachengangaha.
Ia program-ko VVIPs-na mande ra·pilskaani dakan baksa pringni 11 bajioni a·bachengataha aro ia tom·anio Tourism Minister Timothy D Shira mongsonggipa sokgipa ong·e bak ra·angaha.
Deputy Commissioner Dr. Abhishek Saini jinmana aganprakengon, ia program-ko chu·sokatna gita jako ra·e kam ka·gipa sakantikon ua mitelpilskaangaha.
Indake, DIET, Resubelpara-ni chatro chatrirang rimchaksoani gitko ring·angaha aro Mendipathar College, ma·gitcham pagitchamrangni gitko ring·angskae manianiko dingchikbatataha.
Kharkutta-ni MLA Rupert M Momin jinmana aganprakengon, Resubelpara-o donggipa manderang chiring chibima dilbriko man·ani gimin namen rasonggnanggiparang ong·a aro ia bilsio A·we Festival-ko maniani namen dingtangbataha ine aganan baksa, ia program-ko ong·atna dakchakaniko on·ahanina Skotong Minister aro Tourism Minister-ko mitelpilskaangaha.
Lekka porani gamchatani gimin janapatskaengon, a·dokni namroro silroroani ja·pangara lekka pora skianiko ra·anian ong·a aro Education Department-ko tang·doatna aro mangrakbatatna sorkari krenge kamko ka·enga ineba ua aganaha.
Lekka poraianio name dakgenchimode je a·jani je a·baoba name dakna man·genchim ine janapatan baksa, Garo Hills-o tarigipa aro Meghalaya a·doko tarigipa pilak bosturangko ra·china didina aro Meghalaya Games aro National Games 2027-o bak ra·na man·a gita kal·susaani a·bao an·tangtangni changa sapaniko mesokchinaba chadamberangko ua didiataha.
Unbaksana, Goalpara-ni chi rama gita badingchiwale cha·ani cholrangni gimin janapatjolengon, North Garo Hills a·jao tarigipa bosturangko US aro Europe-rangona watatani cholrangni giminba ua talate on·angaha.
Mendipathar-ni MLA Marthon J Sangma-ba, ia manianio bang·en bak ra·enganiko nikna man·enga aro an·tantangni changa sapaniko mesokenga aro ia manianiko ong·atani miksonganiba tourism-ko namdapatanian ong·a, jedakode iandakgipa platform-rango badingchiwalaniko dakenggipa dolrangna uamangni bosturangko mesokna cholko on·ani ong·a ine aganaha.
Mongsonggipa sokgipa Tourism Minister Timothy D Shira-ba jinmana aganengon, ia manianiko manianio jatni dakbewalrangko ripinge rakkiasan ong·aija indiba je chadamberangan song·a ritanio, kal·susaanio, chrokmesaanio, git ring·susaanio ba je dakgipa changa sapanikoba mesokna gita chadamberangna cholko on·ani ong·a ine aganaha.
Tourism-ni bidingo janapatskaengon, Resubelpara-ode Shibalinga-an mongsonggipa niani biap ong·enga aro iano dongchakani nok, cha·a ringani, bhara garo(Taxi) aro gipin nangchongmotgipa kamrangko matchotna nangenga ineba ua aganaha.
Iarangna agreba, Mendipathar College-ni chatro chatrirangni Wangalaniko, Aryaan Dance Academy-ni chrokani, Mobit, Lening, Enosh, DSP aro CM MGMP dolni git ring·susaanikoba nikangna man·aha. Unbaksana, Paschal English Secondary School-ni chatro chatrirang jatni bewalo dake mesokangaha.
Uasan ong·aigija, CM MGMP Catalytic Fund-ni ning·o laptop-rangkoba suale on·angaha.
Indake, ia A·we Festival 2025-ko December 10 tarik chong·motan Budbar salo matchotatgen jeon bon·kame RIPRAP band-ni doke dam·e git ring·aniko nikangna man·gen.
Na·simang iakoba nina man·gen:
Na·simang iakoba poraina man·gen: Dingtang dingtang niamrangko Cabinet ra•chakanga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
