Tura,Jan 5: Garo Hills ba A.chik a.song inditan rona rotogipa aro an.sengbegipa biap ong.a. A.brirangchiko niato tangsekgilgil a.brirang jokenggipa chiringrang, nitoriri buring bolgrimrango rimit, tangsek, gitchak balenggipa bibalrang, ka.sinjrimjrim rona rotogipa biaprang,nitoriri joksalenggipa chiontimram (water falls)-rang A.chik a.songni mikkim rasong ong.a.
Uandakgipa biaprang manderangni gisikko ka.srokata aro gisiko namen kusi ong.ata.Ia gun gnanggipa Garo Hills ba A.chik a.songko Nokgipa Isol dingtangmancha A.chik jatna pattiaha.Indiba ia nitobegipa a.brirang buring bolgrimrang, rong.kolrang, chidare chiontimram-rang aro mingsinggipa chi warirang, an.senggipa biaprangko manderangni nikkugijagiparang bang.en dongkuenga.
Da.ororo manderangni nikrong, nironggipa aro roronggipa biapranga Ganol Chibimao donggipa Pelga Chiontim, Simsang Chibima bisikni Rong.bang Chiontim,Tura-ni Gan.drak Chiontim, Rongram Chiringni Mesak Chiontim, Siju-ni Rongsong Chiontim, Sangknigre-o donggipa Tosok Chiontim, Bandari songo donggipa Bandari Chiontim,Dana A.dugre-ni Gadak Chiontim, Kakiza aro Asakgre jolo donggipa Imilsang Chiontim, rong.kolranga Siju Rong.kol, Ruga Rong.kol, Asakgre-o donggipa Ikilram Rong.kol, Nengkong-o donggipa Te.teng A.kol aro Simsang Chibimani wariranga, Mrik Wari, Kan.aurisuk Wari, Dabat Wari aro gipinrang.Apsandake mingsinggipa a.brirang jekai Nokrek a.bri, Balpakram a.bri, Chitmang (Waimong) a.bri, Ranggira a.bri, Arbella a.bri aro Tura a.bri iarangan Garo Hills ba A.chik a.songko mikkim rasong gnangatgipa gamrang ong.a. Uarangko name ripingna aro mingsing minggamatna biaprangko nitobate, rotobate tarina aro re.a doani Rama jalangrangko namdapatna nanga, maina iandakgipa biaprangko nina gita Garo Hills-ni ning.tugipa biaprangona re.a doani rama jalangrang namjani a.sel nilkugijagipa rong.kolrang, chiontimram-rang aro a.brirangko nina gita re.angna neng.nikani ong.enga.Mikkangchi ua biaprangko name tariode rama jalangrang namode gipin a.songni bang.a manderang Garo Hills-ona re.bae nitogipa biaprangko,rong.kolrangko aro chiontimramrangko nina re.bagen aro an.senggipa biap ine kusi ong.genchim, unbaksana songni nokni manderang nirok simsakanirangko dake, re.bagiparangna dangdik sachianirangko on.ne tangka paisa kamaina namgipa chol ong.genchim.
