Tura, Feb 3: Budbar salpaksachibara 2:00 bajimango, North Garo Hills a•jao Kharkutta bazar-oni Rongchri-ona re•enggipa Sumo gari bolsa a•sel ong•e mande saksa so•otako man•aha.
Koborko on•ani gitade, Budbar salpaksachibara anti cha•e songtangona re•pilenggipa manderangko AS-01M 3993 Sumo gario, ia garini driver Monit D Marak, Rongchri songona salangpilengachim indiba Konchikol jolona sokon ia gari rang•gitik ua biapo a•sel ong•aha aro mande saksa janggitangko gimaatna nangaha.
Ia a•sel ong•anio sianggipa mandeara Rongchri songni Jorong Momin minggipa mande ong•achim ineba North Garo Hills a•jani police-rang parakataha.
Ia gari a•sel ong•anio mande saksa so•otako man•an baksana gario gadoenggipa gipin manderangba saknaanirangko man•tokaha aro uamangko bakan sanna gita Kharkutta primary health centre (PHC)-ona ra•angaha ineba u•iataha.
A•sel ong•anio sianggipa mandeni manggisiko rate niani ja•man nokdangni manderangna pakwate on•ataha.
“Chingni kobor man•soani gitade, ia gariko saltimgipa mande gariko nangana bate ta•rakdugae salani a•selsa Konchikol song jolo a•sel ong•aha. Sigipa mandeni manggisiko rate niani ja•man uni nokdangna pakwate on•ataha aro saknaa man•gipa gipin manderangkoba sannaniko ra•na watataha,” ine North Garo Hills a•jani SP AT Sangma parakataha.
Iani a•selni bidingo police-rang ning•tue sandianirangko dakdapenga ineba SP parakataha.
