Shillong, Oct 7: Adita salrangna skang, Shillong songjinmani Lachumiere-o donggipa National People’s Party (NPP) office sambao IED bomako donanganina police-rang saksako rim•na man•aha aro gipinrangkoba sandiengkua ine Bristibar salo Meghalaya a•dokni Chief Minister Conrad K Sangma parakataha.

“Iani bidingo police-rang saksako rim•na man•aha aro ua an•tangba ia biapo bomako donanga ine ku•rachakaha. Iano jak donggipa gipin manderangkoba rim•na gita ia mandeo police-rang sing•sandiengkua,” ine Conrad, NPP office a•palo kobor ra•timgiparangna parakataha.

NPP office sambao boma donanggiparangkosan ong•aigija adita salrangna skang boma gopretanio jak donggipa manderangkoba police-rang sandie man•aha ineba Sangma parakataha.

NPP office sambao boma donanggipa mande saksako rim•e sing•sandianirangko dakengkua ine talatangengon, iano jak donggipa gipin manderangkoba attamchipak rim•naba gnang ine Chief Minister parakataha.

A•doko ong•enggipa obostarangni bidingo aro manderangni gisepo kenjagokanirang ong•katenggipani bidingo janapatengon, da•o dipet a•doko maming kenna nanganirang dongja indiba sorkari iako mikchepe ra•jaenga ine Sangma parakataha.

Iandakgipa kamrango jak donggipa manderangko rim•na aro mikkangchi iandakgipa a•selrang ong•jana gita police department, an•tangni bil ama gita kamko ka•enga ineba Chief Minister parakataha.