Williamnagar, Oct 13: Budbar salo Meghalaya a•dokni Chief Minister Conrad K Sangma, Pa Togan Nengminja Sangma aro Me•mang Narang-ni postal cover-ko Williamnagar-o oprake on•angaha aro ia postal cover-ko oprake on•anio Meghalaya sorkarini Chief Whip Marcuise Marak aro Gambegre-ni MLA Saleng Sangma-ba dongpae bak ra•angaha.India a•songni jakgitelko man•aoni bilsi 75 gapaniko maniani bak gita a•song gimikon ‘Azadi Ka Amrit Mahotsav’-ko manienga aro iako maniani bak gita postal cover-ko a•dokni Chief Minister, oprake on•angaha.A•dokko jakgitel ong•atna krengdilgipa Pa Togan Nengminja-ni postal cover-ko oprake on•angani somoio a•dokni Chief Minister Conrad Sangma, jinmana aganprakengon, ia postal cover-ko tarianiara Garo Hills-ni matgrikna mande ra•pilskaaniko on•ani gita ong•enga ine parakangaha.

East Garo Hills a•jani Williamnagar samba jolo donggipa Chisobibra-o Pa Togan Sangma-ko gisik ra•na gita biapko tarianio sorkari, dingtangmancha tangka paisarangko dakchake on•gen ineba ia tom•anio Chief Minister parakataha.