New Delhi, Naitung 07 : U Myntri Rangbah ka Jylla Conrad K Sangma ula kyrpad ia ka Sorkar Pdeng ba kan aiti ia ki bor ai jingmynjur ia ka kam tih dewiong sha ka Jylla haba pynksan ba kane ka sienjam kan iarap ia ki hajar tylli ki trai jong ki par kiba rit ba kin lah tih ia u dewiong bad pynim biang ia ka kamai kajih jong ki, kaba la shah ktah naduh ka jingkhang ia ka tih thliew khnai ka National Green Tribunal (NGT) ha u 2014.
Ha ka jingiakynduh bad u Myntri ka Sorkar Pdeng ba khmih ia ka Ministry of Coal and Mines G Kishan Reddy ha New Delhi ha ka sngi Ba-ar, u Myntri Rangbah ula kyrpad ban aiti ia ka bor sha ka Jylla hapoh ka kyndon 26 jong ka Mines and Minerals (Development and Regulation) Act, 1957, ka ban pynlah ia ka Jylla ba kan ai ïa ka jingmynjur ba hashuwa (previous approval) bad ban ai jingmynjur ïa ki mining plan hapoh ka Jylla hi.
U Myntri Rangbah u ong ba ka rukom treikam ba mynta ka donkam ia ki trai jong ki par kiba rit ba kin hap shim ia ki jingai jingmynjur na ki bor kiba don shabar ka Meghalaya, kaba buh ia ki ha ka jingeh namar ka jinglut jingsep bad ka jingbym iahap ki kam.
Ryngkat ka jingsynran bad ka MLA ka Sutnga-Saipung Kong Santa Mary Shylla, u Conrad ula pynpaw ia ka jinglong pher ka rukom bat khyndew hapoh ka Sixth Schedule, ha kaba ka hok halor ka jaka bad ki marpoh khyndew ka dei jong ki riew shimet, ki Kur bad ki Shnong ym jong ka Jylla kumba la pynskhem da ka Iingkashari Supreme Court ha u snem 2019.
U ong ba kane ka riti bat khyndew ha Meghalaya kala pynlong ia ki kyndon tih par ka Ri, kaba la pynwandur na ka bynta ki par kiba heh (large mining block), ba kin long ki bym iahap satia ia ka Jylla, khamtam ba ki par dewiong ki dei kiba saphriang bad shong lynnong lynnong ha ki par kiba rit jong kiba bun ki longiing.
U Conrad ula kdew ruh ba ka kyndon 100 hectare bala buh hapoh ka Standard Operating Procedure 2021, kala khanglad ia bun ki riewlum trai par kiba dei hok ki trai, ba kin ioh ia ki mining lease ban tih ia ki par.
U pynpaw ba da ki hajar ki longiing, kila duh ia ka tyllong kamai naduh ba ka NGT kala khang ia ka jingtih dewiong thliew khnai ha Jylla ha u snem 2014, katba ka Jylla ruh kala mad ia ka jingduhnong kaba jur na ka jingioh lum khajna.
Ula pynkynmaw ba ka Ministry of Coal, ha ka jingiakren, kala mynjur ia ka jingkyrpad ka Meghalaya ban pynjynsur naduh u snem 2015, u Myntri Rangbah ula kyrpad ba ka Sorkar Pdeng kan pyndep ia ka sienjam da kaba pynmih ia ka jingpynbna (Notification) hapoh ka kyndon 26 kaba ai ia kine ki bor sha ka Jylla, ryngkat bad ki bor ba iasoh hapoh ka Mineral Concession Rules, 1960 bad ka Mineral Conservation and Development Rules, 2017. Ia ka dorkhas kaba bniah lah aiti sha u Myntri ka Sorkar Pdeng ha kane ka jingialang.
Haba kut jong ka jingialang, u Myntri ka Sorkar Pdeng ula ai jingmut ban thaw ia ka Committee ka ban bishar ia kane ka kam. U Myntri Rangbah ula pdiang ia kane ka jingai jingmut, bad ia ka committee la khmih lynti ban sa thaw noh kham kloi.
U Myntri Rangbah ula pynpaw ia ka jingkyrmen ba kane ka sienjam kan plie ia ka lynti na ka bynta ki hajar tylli ki longiing ha Jylla ba kin kamai ia kamai kajih kat kum ka ain bad kaba don burom na ki marpoh khyndew jong ki hi, hapoh ka jingpyniaid kaba biang bad ka jingpeitngor jong ka khlain jong ka Jylla.
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
