Shillong, Jun 9: PM eBus Sewa Scheme-ni ning·o electric bus gari bolbongako Mongolbar salo, Meghalaya a·dokni Chief Minister Conrad K Sangma, Shillong songjinmani Taraghar – State Guest House-o a·bachengate on·angaha aro ian songjinmarango re·a doani cholrangko namdapatna aro garirangni wal·kuchi moila ong·ataniko komiatna mongsonggipa ja·ku de·ani gita ong·aha.
Ia scheme-ni skanggipa bako, manderangna rongtalgipa aro dongtogipa re·a doani cholko on·na gita electric bus gari bongako a·dokona ra·bachengaha aro ia electric bus garirangara air-conditioned (AC) dongjolgipa ong·an baksana wal·ku ong·atgipa garirang ong·ja. Ia electric bus gario driver-ko man·chape gimik sak 25 manderangna biap donga aro ia bus gario songre-songgabatenggipa manderang, neng·nikanirangko man·jana gita e-ticketing system-ba donga.
Ia electric bus garirangko a·bachengate on·anganio a·dokni Chief Minister Conrad K Sangma, jinmana aganprakengon, ia gital electric bus garirangko man·bae on·ahanina Urban Affairs Department-ko mittelpilangaha aro PM eBus Sewa Scheme-chi Meghalaya a·dokni songjinmarango re·a doani cholrangko tang·doatna krenge kam ka·anio dakchakaniko on·ahani gimin India sorkarikoba mittelpilangaha.
Ru·uta bilsirangonin Shillong songjinmao, manderangko salrurae on·gipa gari gorarangna neng·nikanirangko man·na nangengani gimin batanggimin bilsirango dingtang dingtang cholrangko sorkari dake niaha ine janapatengon, Shillong songjinmao electric bus garirangko a·bachengataniara, songjinmao nangani kri re·a doani cholko bikotanio mongsonggipa ja·kuko de·ani gita ong·aha ine Chief Minister parakataha.
Shillong songjinmani apchangket ong·aniko komiatna sorkarini ra·gatgipa dingtang dingtang project-rangni gimin janapangengon, dingtang dingtang biaprango parking facility ba gari donchakani gital biaprangko tariengaha aro Mawdiangdiang-o rikenggipa administrative city-an Shillong songjinmao apchangket ong·aniko komiatanio mongsonggipa ong·gnok ine Chief Minister aganaha.
Shillong aro gital administrative city-ni gisepo, ka·sinsin office-rangko apjitna aro Shillong songjinmao gari gorarangni re·ruraaniko komiatna gita four-lane rama baksana adita ramarangko tarina miksongenga ineba Chief Minister parakataha.
Electric bus garirangko a·bachengatani, gari donchakgipa biaprangko taridapani aro gital administrative city-ko rikani, ia pilakan Meghalaya a·dokna, mongsongbate skotong Shillong songjinmana niksamsoani baksa sorkarini a·bachengatgipa kamrangan ong·a ineba Chief Minister aganaha.
Electric garirangna registration fee aro road tax-rangko watani bidingo talataniko on·angengon, bilsi gittamna a·bachengo dongimin somoi bon·ahani gimin da·o niamrangko gital dake tariengaha aro gital dake tarienggipa niamrangko Cabinet ra·chakahaon, electric garirangna ia apsan niamkon ja·rikangkugen ine Chief Minister parakataha.
Ia electric bus garirangko a·bachengate on·anganio a·dokni Chief Secretary Dr Shakil P Ahammed, Urban Affairs Department-ni Commissioner & Secretary Dr Vijay Kumar D aro gipinrangba dongpae bak ra·angaha.
Na·simang iakoba nina man·gen:
Na·simang iakoba poraina man·gen: Salgro salaram jolrangno ge•e game cha•giparangna namgiko ra•bana agroforestry-ko a•bachengatna parakata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
