Shillong, Naitung 23 : Ka Iingkashari Supreme Court ha ka sngi Palei, kala pynduh (cancel) ia ka jamin bala ai sha ka Sonam Raghuvanshi, ka nongshah kynnoh ba hakhmat eh ha ka jingpyniap iala u kurim Raja Raghuvanshi, haba ong ba ka High Court kala bakla ban pynlait ia ka tang namar ka jingthoh bakla ha ka arrest memo jong ka.
Ka Iingkashari u Justice MM Sundresh bad PB Varale kala ailad ia ka Sorkar Meghalaya ban buh jingkyrpad bad bthah ia ka Sonam Raghuvanshi ba kan wan pyndem ialade hapoh ka lai taiew. Hynrei, ka Iingkashari ka ong pat ba ka Sonam ka lah ban aplai ia ka jamin ba thymmai lada ka jingbishar kam dep hapoh ka hynriew bnai.
Ka Sonam kala shah kynnoh ba ka iasylla lem bad lai ngut ki briew da kaba thong pisa ban pyniap iala u kurim, Raja Raghuvanshi, ha ka jingwan leh honeymoon ha Sohra ha u bnai Jylliew 2025. Ia ka met u Raja la lap hadien napoh ka riat.
Ia ka jamin jong ka la ai hadien ba ka Iingkashari kala pdiang ia ka jingpynksan ba ka arrest memo kala bakla kdew ia ka kyndon 403 (1) jong ka Bharatiya Nyaya Sanhita ha ka jaka ka kyndon 103(1), kaba lam sha ka jingbym biang ka rukom pyntip ia ki nongrim ka jingkem ia kane ka briew.
Haba kyntait ia kane ka jingpynshong nongrim, ka Supreme Court kala ong ba ka don ka jingiapher kaba hai hapdeng ka jingbym pyntip ia ki nongrim ka jingkem bad ka jingbakla ha ka rukom thoh bala kdew ha ki kot ki sla ba kem ia ka. Kala pynpaw ba ka Sonam kala iohpdiang ia ki kot ki sla ba kem ia ka bad kubur ia kane hakhmat jong ka Magistrate.
Ka Iingkashari kala shem ruh ba ka jingkyrpad bah jamin halor ki nongrim ha hashuwa, ka dei kaba la dep ban kyntait bad ka jingailad ia ka ban don ha ka jamin ka lah ban ktah ia ka jingbishar ba dang iaid mynta.
Pule ruh :Â Hiar jurip ka Assembly Committee ia ki project Um bad IT ha Shillong
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
